नगर जिल्ह्यात महाबीज करणार ३३८४ हेक्‍टरवर बीजोत्पादन

नगर  : महाबीजतर्फे जिल्ह्यातील सात तालुक्‍यांत ३३८४ हेक्‍टर क्षेत्रावर बिजोत्पादन कार्यक्रम राबविला जाणार आहे. त्यात सर्वाधिक ३१५८ हेक्‍टर क्षेत्र सोयाबीनचे असेल. महाबीजतर्फे दरवर्षी हा उपक्रम राबविला जातो. पायाभूत बियाणे पुरवठा करून नंतर त्याची २५ टक्के जादा दराने खरेदी केली जाते.

महाबीजतर्फे दरवर्षी बिजोत्पादन कार्यक्रम राबवला जातो. यंदाही हा कार्यक्रम राबवला जात आहे. त्यासाठी महाबीजतर्फे पायाभूत बियाणे विकत दिले जाते. एका गावात साधारण २५ हेक्‍टर क्षेत्रापर्यंत बियाणे पेरणी होते. पेरणीनंतर बीज प्रमाणिकरण अधिकाऱ्यांकडून नोंदणी करत तपासणी केली जाते. डिसेंबर, जानेवारी महिन्यातील सरासरी दर ग्राह्य धरत त्याच्या वाढीव २५ टक्के दराने महाबीज हे बियाणे खरेदी करते. शिवाय शेतकऱ्यांना दरावर बोनसही दिला जातो.

बिजोत्पादनासाठी विलीनीकरणानुसार पेरणी केली जाते. त्यासाठी तुरीच्या अन्य वाणाचे १०० मीटरचे अंतर तर सोयाबीनचे तीन मीटरचे अंतर असणे गरजेचे आहे. यंदा जिल्ह्यातील नगर, नेवासा, शेवगाव, पाथर्डी, कोपरगाव, राहाता, श्रीरामपूर या सात तालुक्‍यांत ३३८४ हेक्‍टर क्षेत्रावर बिजोत्पादन घेतले जात आहे. ज्या शेतकऱ्यांना यात सहभागी व्हायचे आहे, त्यांनी तालुका अथवा जिल्हा कार्यालयाशी संपर्क करण्याचे आवाहन महाबीजचे जिल्हा व्यवस्थापक सी. के. देशमुख, सुनील दौंड यांनी केले आहे.