निताने येथे वीजवाहक तारांच्या शॉर्टसर्किटमुळे उसाला आग

   नाशिक  : बागलाण तालुक्यातील निताने येथील जयंत देवरे यांच्या उसाच्या शेतात वीजवाहक तारांमध्ये शॉर्टसर्किट होऊन लागलेल्या आगीत ऊस जळून खाक झाला. या आगीत उसाबरोबरच पाणी देण्यासाठी वापरण्यात येणारे पाइप जळाल्याने एकूण दीड ते दोन लाख रुपयांचे नुकसान झाले. नागरिकांच्या प्रयत्नात आग विझविल्याने पुढील नुकसान टळले.      निताने शिवारातील जयंत देवरे यांच्या मालकीच्या गट क्रमांक ४१२ मध्ये (ता.१४) सकाळी सात वाजण्याच्या सुमारास शेतावरून गेलेल्या वीजवाहक तारांमध्ये शॉर्टसर्किट झाल्याने उसाच्या शेताला आग लागली. पाण्याअभावी उसाच्या सुकलेल्या पाचटाने तत्काळ पेट घेतल्याने लागवड क्षेत्रातील निम्यापेक्षा अधिक ऊस जळाला. तसेच पाणी देण्यासाठी वापरण्यात येणारे पाइप जळाल्याने देवरे यांचे मोठे नुकसान झाले आहे. शेजारील शेतकरी महेंद्र देवरे यांना आग लागल्याचे निदर्शनास आल्यानंतर त्यांनी पंचायत समिती सदस्य वसंत पवार, अमोल देवरे, संजय देवरे, किरण अहिरे, मनू देवरे, केतन खैरनार, पप्पू पवार, दिनेश देवरे, रामकृष्ण देवरे, जीभाऊ देवरे व परिसरातील शेतकऱ्यांच्या मदतीने लागलेली आग विझविली. तलाठी एस. एस. भालेराव यांनी घटनास्थळी पाहणी करून पंचनामा केला.     वीज वितरण कंपनीचा बेजबाबदारपणा?    जिल्ह्यात अनेक ठिकाणी विजेच्या खांबावरून वीजतारा लोंबकळत आल्याचे निदर्शनास येते. तरीही कार्यवाही होत नसल्याचे शेतकऱ्यांचे म्हणणे आहे. शेतातून जाणाऱ्या वीजवाहक तारा धोकादायक तर आहेतच मात्र, शेतीकामात अडचणी आणणाऱ्या आहेत. त्यामुळे शेतकऱ्यांमध्ये तीव्र संताप व्यक्त होत आहे.