खरिपाच्या आशा उंचावल्या; नाशिक तालुक्यात १४३ टक्के पाऊस

नाशिक  : जिल्ह्यातील जवळपास निम्म्या तालुक्यांमध्ये पावसाने जून महिन्याची सरासरी ओलांडली आहे. विशेष म्हणजे एक दिवसाच्या संततधारेमुळे ही सकारात्मक परिस्थिती निर्माण झाली आहे. यामुळे खरिपाच्या आशा उंचावल्या आहेत. नाशिक तालुक्यात सर्वाधिक १४३ टक्के पाऊस झाला असून, बागलाण तालुक्यात १४० टक्के पावसाची नोंद झाली आहे.

या महिन्यात जिल्ह्यात २३२४.५० मिलिमीटर पाऊस होणे अपेक्षित आहे. सोमवारी (ता. २५) सकाळी साडेआठपर्यंत जिल्ह्यात १३८३.६ मिलिमीटर पावसाची नोंद झाली होती. या दिवशी सायंकाळनंतर आणि मंगळवारी (ता. २६) दिवसभर झालेल्या पावसामुळे जिल्ह्यात २१२७.८ मिलिमीटर पावसाची नोंद झाली आहे. म्हणजेच या एक-दोन दिवसांत ७४४ मिलिमीटर पावसाची नोंद झाली असून, जूनच्या सरासरीच्या ९१.५४ टक्के पाऊस झाल्याची माहिती जिल्हा प्रशासनाने दिली.

चालू हंगामात १ ते २६ जूनदरम्यान आतापर्यंत १४१.८५ मिलिमीटर पाऊस झाल्याची नोंद झाली आहे. माॅन्सूनमध्ये होणाऱ्या एकूण पावसाच्या तुलनेत हा पाऊस १४ टक्के आहे. नाशिकमध्ये १५ पैकी तीन तालुक्यांनी दोन दिवसांपूर्वीच जून महिन्याची सरासरी ओलांडली होती. मात्र, सोमवारच्या पावसानंतर अशी सरासरी ओलांडणाऱ्या तालुक्यांची संख्या सात झाली आहे. यामध्ये बागलाण, मालेगाव आणि येवलापाठोपाठ आता नाशिक, चांदवड, देवळा आणि सिन्नर या चार तालुक्यांची भर पडली आहे. या तालुक्यांमध्येही १०० टक्क्यांहून अधिक पाऊस झाला.