'वसाका'ची चाके पुन्हा फिरणार

नाशिक : वसंतदादा साखर कारखाना, ''धाराशिव'' कारखाना प्रशासनाने भाडेतत्त्वावर चालविण्यासाठी घेतला होता. मात्र, कामगारांचे वेतन थकल्याने कामगार वर्ग व धाराशिव कारखाना प्रशासन यातील वाद विकोपाला गेला. परिणामी, कामगारांनी कामकाज बंद पाडले होते. दरम्यान, याबाबत तोडगा निघाला असून कामगार व प्रशासनाने कारखाना सुरू करण्याबाबत परस्परांत सहमती दर्शविली आहे.  या प्रकरणात चांदवड - देवळ्याचे आमदार डॉ. राहुल आहेर यांच्या यशस्वी मध्यस्थीनंतर कामगार संघटना व धाराशिव कारखान्याच्या प्रशासकीय मंडळांबरोबर सोमवारी (ता. १०) नाशिक येथे उभयतांची बैठक घेतली. त्याच दिवशी कामगार संघटना व धाराशिव कारखान्याचे अध्यक्ष अभिजित पाटील व त्यांचे संचालक यांच्यात पहिल्यादाच चर्चा घडवून आणली. त्यामुळे एकमेकांबद्दल असलेला आकस दूर करत कामगारांच्या रास्त मागण्या संदर्भात चर्चा घडवून आणली. त्यानंतर गुरुवारी (ता. १३) सर्व कामगांराची बैठक वसाका कारखाना कार्यस्थळावर आयोजित करण्यात आली. या वेळी कामगारांनी वसाका कामगार युनियनसोबत खंबीरपणे उभे राहत कामगारांच्या विविध मागण्यांसंर्दभात होणाऱ्या द्विपक्षीय कराराला पाठिंबा दर्शवीत चर्चेचा मार्ग मोकळा करून दिला. त्यामुळे करारासंदर्भात अंतिम चर्चा करण्यासाठी शुक्रवारी (ता.१४) आमदार डॉ. राहुल आहेर यांनी त्याच्या देवळा येथील निवासस्थानी कामगार युनियन व धाराशिवचे संचालक यांच्यात अंतिम बैठक घडवून आणली. या बैठकीत थकीत पगार व करारासंदर्भात तोडगा काढण्यात आला. त्यास दोन्ही बाजूने योग्य प्रतिसाद मिळाल्यामुळे कामगाराच्या पदरात नक्कीच काहीतरी पडेल व परत एकदा वसाकाची चाके फिरतील अशी आशा निर्माण झाली आहे. थकीत पगार व इतर सर्व मागण्यासंदर्भात लिखित करार येत्या आठ दिवसांत पूर्ण होऊन करारावर सह्या झाल्यानंतर पगार व वसाकाचे दैंनदिन कामकाज सुरू करणार असल्यांचे धाराशिव कारखान्याच्या प्रशासनाकडून सांगण्यात आले आहे.