जळगाव जिल्ह्यात तुरीचे उत्पादन घटले

जळगाव ः जिल्ह्यात कोरडवाहू तुरीचे कमाल दोन क्विंटल उत्पादन हाती येत आहे. बागायती किंवा सिंचन केलेल्या तुरीचे उत्पादन एकरी पाच क्विंटलपर्यंत आहे.यंदा बागायती तूर उत्पादकांना एकरी दोन ते तीन क्विंटल उत्पादन कमी आल्याची माहिती आहे.

जिल्ह्यात सुमारे साडेतीन हजार हेक्‍टरवर तुरीची लागवड झाली होती. कोरडवाहू तूर जामनेर, मुक्ताईनगर, बोदवड, जळगाव भागात अधिक होती. बागायती तुरीची लागवड रावेर, यावल, चोपडा, मुक्ताईनगरमधील गावांमध्ये अधिक होती. तुरीची कापणी व मळणी अंतिम टप्प्यात आहे. अनेक शेतकऱ्यांनी उत्पादन घेत तिची विक्रीही बाजारात केली आहे. दर परवडणारे नाहीत. त्यातच आता उत्पादनही अपेक्षित प्रमाणात न आल्याने शेतकऱ्यांची अडचण वाढली आहे.

रावेर, यावल भागात अनेक शेतकरी सूक्ष्मसिंचनावर तुरीची लागवड करतात. जूनमध्ये ही लागवड केली जाते. या भागातील शेतकरी एकरी नऊ क्विंटलपेक्षा अधिक उत्पादनही अनेकदा घेतात. तुरीला कमी पाणी लागते, पण कोरडवाहू तुरीला पावसाच्या लहरीपणामुळे फटका बसला. ऑक्‍टोबरमध्ये पाऊस आला. पण त्या वेळी काळ्या कसदार जमिनीत पीक बरे असताना जादा पावसाची पिकाला बाधा झाली.

काळ्या कसदार जमिनीत मर रोगाचा प्रादुर्भाव झाला. तूर लाल, पिवळी पडून वाळण्याचे प्रकार मर रोगामुळे झाले. यामुळे पिकात तूट आली. फूलगळही अधिकची झाली. परिणामी उत्पादन कमी आले आहे.