खानदेशातील पाणीटंचाई गंभीर

जळगाव : खानदेशात पाणीटंचाई दिवसेंदिवस बिकट होत आहे. अगदी गिरणा व पांझरा नदीकाठच्या विहिरी, कूपनलिका आटत आहेत. केळी, पपई, कापसाच्या दर्जेदार उत्पादनासाठी प्रसिद्ध असलेल्या सातपुडा पर्वतालगतच्या गावांमध्येही टंचाई स्थिती चिंताजनक बनली आहे. शिवारात, गावात पाण्याचे संकट वाढत असल्याची स्थिती आहे. 

जळगावमधील रावेर हा मुबलक पाणी, केळीच्या उत्पादनासाठी प्रसिद्ध असलेला तालुका आहे. परंतु, रावेरातील निरूळ व लगतच्या गावांमध्ये पाच दिवसाआड पिण्याचे पाणी येते. टॅंकर सुरू आहे. रोज २०० ते २५० लीटर पाणी एका कुटुंबाला या टॅंकरच्या माध्यमातून मिळते. यावलमधील न्हावी, हंबर्डी भागांतही टंचाई वाढत आहे. शिवारात केळीची शेती संकटात आहे. कूपनलिकांचे पाणी झपाट्याने आटू लागले आहे. 

चोपडा तालुक्‍यातही सातपुडालगतच्या खर्डी, लोणी, पंचक, धानोरा, अडावद, लासूर, चुंचाळे भागांतही जलसंकट आहे. भुईमुगाची शेती या भागात संकटात आहे. कांद्याची लागवड नगण्य आहे. धुळे जिल्ह्यातील शिरपूर, तऱ्हाडी, अर्थे, कुवे, निमझरी भागात पपईच्या बागा वेळेआधीच काढण्याची वेळ आली आहे. कांदा लागवडीसाठी प्रसिद्ध असलेल्या तऱ्हाडीमध्ये लागवड १० टक्‍क्‍यांवर आली आहे. नंदुरबार जिल्ह्यातही सातपुडालगतच्या सुसरी, गोमाई नदीनजीकच्या गावांमध्ये पाण्याची समस्या वाढू शकते. शिवारात पाण्याची काटकसर करण्याची, केळी लागवड कमी करण्याची वेळ आल्याचे सांगण्यात आले. 

पीक अर्ध्यावर सोडण्याची वेळ खानदेशात जळगाव जिल्ह्यात सुमारे २८, धुळे, नंदुरबारात २५ टॅंकर सुरू आहेत. नंदुरबार तालुक्‍यात कोठली, पळाशी, धमडाई, पथराई, कोळदा, लहान शहादे, नाशिंदा, शिंदे, खोंडामळी, चौपाळे, रनाळे आदी ३५ गावांमध्ये टंचाई वाढली आहे. कोळदा येथे शिवारातून रोज पिण्याचे पाणी ग्रामस्थांना आणावे लागते. मिरचीची शेती अर्ध्यात सोडून देण्याची वेळ पळाशी, धमडाई, कोळदा भागांतील अनेक शेतकऱ्यांवर आली, असे सांगण्यात आले.