नाशिकला कांद्याची आवक वाढली

नाशिक : जिल्ह्यात महाशिवरात्रीनंतर द्राक्ष हंगामाने वेग धरला आहे. द्राक्षाचे निर्यातीचे मार्केट स्थिर आहे. त्या तुलनेत देशांतर्गत बाजारांतून द्राक्षांना चांगली मागणी वाढली आहे. कांद्यासाठी प्रसिद्ध असलेल्या नाशिक जिल्ह्यातील बाजार समित्यांतून गत सप्ताहात लाल कांद्याबरोबरच उन्हाळ कांद्याची आवक वाढली आहे.

नाशिकमधून युरोपमध्ये मोठ्या प्रमाणावर द्राक्ष निर्यात होत आहे. युरोपीय बाजारपेठांत द्राक्षांची आवक क्षमतेपेक्षा अधिक झाल्याने तेथील दर किलोला ५० ते ८० रुपये तर सरासरी ६५ रुपयांवर स्थिर आहेत. महाशिवरात्रीनंतर दिल्लीसह उत्तर भारतात थंडीचे प्रमाण घटले असून, मागणी वाढली आहे. या स्थितीत देशांतर्गत बाजारपेठांत द्राक्षांचे दर वधारले आहेत. गत सप्ताहात देशांतर्गत बाजारपेठांत द्राक्षांना प्रतिकिलोला ३० ते ६० तर सरासरी ४५ रुपये दर मिळाले.

नाशिक जिल्ह्यातील १५ बाजार समित्या व ४५ उपबाजार हे कांद्यासाठी प्रसिद्ध आहेत. या बाजारात मोठ्या प्रमाणावर लाल कांद्याची आवक सुरू आहे. गत सप्ताहात प्रत्येक बाजार समितीत सरासरी १५ हजार क्विंटल कांद्याची आवक झाली. लासलगाव बाजार समितीत सरासरी १८ हजार क्विंटल लाल कांद्याची आवक झाली. या स्थितीत सोमवारी (ता.२६) कांद्याला  १००० ते १३१५ रुपये, तर सरासरी ११५० रुपये क्विंटल दर मिळाले.

दरम्यान १५ फेब्रुवारीपासून बाजारातील उन्हाळ कांद्याची आवक सुरू झाली आहे. या वेळी उन्हाळ कांद्याला ९०० ते १२०१ रुपये तर सरासरी १०११ रुपये क्विंटल असा दर मिळाला. येत्या काळात कांद्याचे दर टिकून राहतील, असे बाजार समितीच्या सूत्रांनी सांगितले.