सोलापूर ः येथील कृषी उत्पन्न बाजार समितीच्या आवारात कांद्याची आवक वाढली आहे; पण मागणी चांगली असल्याने दरही चांगलेच वधारले. कांद्याला गतसप्ताहात सर्वाधिक ४००० रुपये क्विंटलवर दर पोचल्याचे; तसेच भाजीपाल्याच्या दरातील तेजीही पुन्हा टिकून राहिल्याचे बाजार समितीच्या सूत्रांकडून सांगण्यात आले.
बाजार समितीच्या आवारात कांद्याची आवक रोज जेमतेम ८० ते १०० गाड्यांपर्यंत राहिली; पण या सप्ताहात कांद्याची आवक शंभराहून २०० ते ३०० गाड्यांपर्यंत पोचली. कांद्याची सर्व आवक स्थानिक भागासह बाहेरील जिल्ह्यातूनही होती. विशेषतः नगर, पुणे, सांगली, उस्मानाबाद भागातून कांद्याची सर्वाधिक आवक झाली. कर्नाटकातील विजापूर, गुलबर्गा भागातूनही काही प्रमाणात आवक झाली. पण मागणी वाढल्यामुळे कांद्याच्या दरातील तेजी वाढली. कांद्याला किमान ७०० ते कमाल ४००० रुपये; तर सरासरी ३३०० रुपये क्विंटल असा दर मिळाला.
गेल्या दोन आठवड्यांपासून कांद्याच्या दरात किंचित चढ-उतार वगळता दर टिकून आहेत. या सप्ताहात मागणी वाढल्याने दराने आणखी उसळी घेतली. येत्या आठवड्यात आवक वाढली, तरी मागणी असल्याने दर पुन्हा वधारतील, अशी माहिती व्यापाऱ्यांकडून देण्यात आली.
त्याशिवाय टोमॅटो, वांगी, दोडका यांच्या दरातही पुन्हा तेजी राहिली. टोमॅटो वगळता वांगी आणि दोडक्याची आवक तुलनेने खूपच कमी झाली. टोमॅटोची रोज अर्धा ते एक टनापर्यंत राहिली. वांगी आणि दोडक्याची ४० ते ८० क्विंटलपर्यंत आवक राहिली. टोमॅटोला १५० ते २५० रुपये, वांग्याला २०० ते ३५० रुपये आणि दोडका २०० ते ३०० रुपये प्रतिदहा किलो असा दर मिळाला.
भाजीपाल्यामध्ये कोथिंबिर, मेथी, शेपूचे दरही या सप्ताहात पुन्हा वधारलेलेच राहिले. भाज्यांची आवकही जेमतेम झाली. रोज ७ ते १० हजार पेंढ्यांपर्यंत आवक राहिली. त्यातही मेथीला चांगला दर मिळाला. मेथीला ५०० ते १३०० रुपये, कोथिंबिरीला ७०० ते १००० रुपये आणि शेपूला ५०० ते ७०० रुपये शेकडा असा दर राहिला.