पुणे ः विविध कीड-रोगांपासून पिकांची आरोग्याविषयक काळजी घेण्यासाठी, तसेच कृषिविषयक सल्ला, उपायोजना सुचविण्याठी पुणे जिल्हा परिषदेच्या वतीने शेतकऱ्यांना ‘अॅग्रो अॅम्ब्युलन्स’ ही सेवा देण्यात येणार आहे. कृषी उत्पादन आणि शेतकऱ्यांच्या उत्पन्नात वाढ करण्याच्या उद्देशाने ही सेवा देण्यात येत आहे. कृषी आणि पशुसंवर्धन विभागाच्या योजनांची प्रसिद्धी या माध्यमातून करण्यात येणार असल्याचे जिल्हा परिषदेच्या कृषी व पशुसंवर्धन सभापती सुजाता पवार यांनी दिली.
कृषी सभापती सुजाता पवार, जिल्हा परिषदेचे मुख्य कार्यकारी अधिकारी सूरज मांढरे यांच्या कल्पनेतून जिल्ह्यात राबविण्यात येणाऱ्या पथदर्शी योजनेसाठी अर्थसंकल्पात १० लाख रुपयांची तरतूद करण्यात आली आहे. या वर्षी प्राायोगिक तत्त्वावर एक ‘अॅग्रो अॅम्ब्युलन्स’ सुरू करण्यात येणार आहे. कृषिदिनी (ता. १ आॅगस्ट) या सेवेची सुरवात केली जाणार आहे.
जिल्हाभर फिरणाऱ्या या अॅम्ब्युलन्ससाठी टोलफ्री क्रमांक, व्हाॅट्सअॅप क्रमांक जाहीर करण्यात येणार आहे. त्यावर शेतकऱ्यांनी त्याच्या शेतातील पिकांचे व किडीचे फोटो पाठवावेत, त्याबाबतही तज्ज्ञांकडून त्यांना मार्गदर्शन करण्यात येणार आहे.
राज्यासह देशभरात कृषिविषयक अनेक प्रयोग राबविले जातात. शेतकऱ्यांच्या यशोगाथा, कृषिविषयक नवीन संकल्पना, सेंद्रिय, रेसिड्यूविरहित उत्पादन, कीटकनाशके फवारणी करताना घ्यावयाची काळजी, यांत्रिकीकरणाचा प्रभावी वापर यांचा प्रचार आणि प्रसार सामान्य शेतकऱ्यांपर्यंत करण्यासाठी ‘अॅग्रो अॅम्ब्युलन्स’ सेवा उपयुक्त ठरणार असल्याचे पवार यांनी सांगितले.
अशी असेल ‘अॅग्री अॅम्ब्युलन्स’
शेतकऱ्यांना दृकश्राव्य माहिती देण्यासाठी एलईडी. मार्गदर्शनासाठी तज्ज्ञांची उपस्थिती. विविध कीड-रोगांविषयी माहिती. कीटकनाशकांच्या वापरासाठी सल्ला. नैसर्गिक आपत्तीवेळी आवश्यक मार्गदर्शन. हेल्पलाइनच्या मदतीने शेतकऱ्यांना घरबसल्या माहिती. कृषी, पशुसंवर्धन योजनांच्या प्रचार, प्रसिद्धीवर भर.