आरे-वाकी पिंपळवटमधील ग्रामस्थांनी लोकसहभागातून बंधारे बांधल्याने चांगल्या प्रकारे जलसंधारण झाले आहे.
आरे-वाकी पिंपळवटमधील ग्रामस्थांनी लोकसहभागातून बंधारे बांधल्याने चांगल्या प्रकारे जलसंधारण झाले आहे.

बंधाऱ्यांमुळे भाजीपाला लागवडीला मिळाली चालना

आरे -वाकी पिंपळवट गाव गेली तीन वर्षं जलसंधारणासाठी बंधारे अभियान राबवीत आहे. उत्स्फूर्त लोकसहभाग असेल तर मोठे कामदेखील कसे सहज शक्‍य होते याचे उदाहरण या ग्रामस्थांनी सर्वांसमोर ठेवले आहे. गेली तीन वर्षे सातत्याने ६० पेक्षा जास्त बंधारे बांधणाऱ्या ग्रामस्थांनी या वर्षी ७५ बंधारे बांधले आहेत. यातून जलसंधारणाला चांगली मदत झाली आहे. आरे-वाकी पिंपळवटमधील १५ पैकी १३ वाड्यांमध्ये सरासरी ५ ते ६ बंधारे लोकांनी बांधले आहेत. आरे विविध कार्यकारी सेवा सहकारी सोसायटी, हेमचंद्र मोरे, मिलिंद पडवळ, सुधीर भोसले, श्रीकृष्ण परचुरे व गजानन कळझुणकर यांनी वैयक्तिक बंधारे बांधले. या बंधाऱ्यांमुळे गावातील ३५ विहिरींतील पाण्याची पातळी वाढली. एका वर्षी ग्रामपंचायतीने २५ हजार रुपये खर्च करून बंधाऱ्यांना लागणारा प्लॅस्टिक कागद पुरविला. त्यानंतर लोकसहभागातूनच बंधाऱ्यांसाठी आवश्‍यक खर्च करण्याचा निर्णय ग्रामस्थांनी घेतला. ७५ बंधारे बांधण्यासाठी प्रकाश सावंत, संदीप देवकर, साईनाथ कळझुणकर, जिल्हा परिषद शाळांनी बंधाऱ्यांसाठी स्वयंस्फूर्तीने आर्थिक मदत आणि वेळ दिला.  बंधारे बांधल्याने वाकी पिंपळवट परिसरात काजूचे क्षेत्र ६७ हेक्‍टर, तर भाजीपाल्याखालील क्षेत्र सात एकराने वाढले. बंधाऱ्यामुळे नवीन लागवड क्षेत्राला पाणी देणे शक्‍य झाले आहे. भाजीपाला करणाऱ्या शेतकऱ्यांची संख्या वाढली आहे. नागदेवाडी येथील नळपाणी योजनेचा पाणीसाठा वाढल्याने मे महिन्यापर्यंत पाण्याचे नियोजन करणे ग्रामपंचायतीला शक्‍य झाले आहे. शासनाच्या फळबाग लागवडीतून गेल्या वर्षी काजू लागवड करण्यात आली. काही शेतकऱ्यांनी काजू लागवडीमध्ये भाजीपाल्याचे आंतरपीक घेतले आहे. याआधी मेपर्यंत पाणी मिळत नसे. मात्र बंधाऱ्यानंतर बागायतदारांना शिंपण्यासाठी पाणीही उपलब्ध झाले. 

अधिकाऱ्यांकडून बंधारे, शेतीची पाहणी गुहागर पंचायत समितीच्या उद्दिष्टपूर्तीमध्ये आरे गावातील बंधाऱ्यांचा वाटा मोठा असतो. तसेच जलसंवर्धनातून शेतकऱ्यांचे आर्थिक सक्षमीकरण सुरू झाले. त्यामुळे जिल्हा परिषदेचे मुख्य कार्यकारी अधिकारी लक्ष्मीप्रसाद मिश्रा, जिल्हा सहकारी अधिकारी, आयएएस अधिकारी अभिनव गोयल यांनी गावाला भेट देऊन बंधारे आणि शेतीची पाहणी केली.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com