सुधारित कृषी अवजारांबाबत माहिती द्यावी.

म.कृ.वि. बैलचलित खत व बी पेरणी यंत्र  या यंत्राच्या साह्याने आपण विविध पिकांची पेरणी करू शकतो. दोन ओळींतील व दोन रोपांतील अंतर पाहिजे ते ठेवू शकतो. खत व बी एकाच वेळी पेरू शकतो, त्यामुळे बियाण्याचे व खताचे नुकसान होत नाही. या यंत्राच्या साह्याने आपण आंतरपिके घेऊ शकतो.

बैलाच्या साह्याने चालणारा पाच दातेरी मोगडा/ पेरणी यंत्र  या अवजाराचा वापर दुय्यम व आंतरमशागतीसाठी करता येतो. या मोगड्यावर पेरणीच्या संरचना बसवून दोन फणी व तीन फणी पेरणी यंत्रही तयार करता येते. हा मोगडा लाकूड किंवा लोखंडापासून तयार करता येतो.

तीन फणी मोगडा  हा मोगडा आंतरमशागतीसाठी कोळप्यासारखा वापरता येतो. पुढे दोन व त्याच्या मधोमध मागे एक असे तीन फणांचे हे कोळपे असते. फणाचे फाळ त्रिकोणी पात्यांचे असतात, त्यामुळे पिकाच्या दोन रांगांमधील जमीन उकरली जाते. या अवजाराने तणे निघतात, लहान सरी-वरंबे तयार होतात; तसेच पिकाच्या बुंध्याजवळ मातीची भर पडते. एका दिवसात साधारण एक हेक्‍टर क्षेत्राची आंतरमशागत होऊ शकते.  

संपर्क : ०२४५२- २२९०००  वसंतराव नाईक मराठवाडा कृषी विद्यापीठ, परभणी