ओट चारा पीक लागवड तंत्रज्ञान

ओट हे एक रब्बी हंगामातील महत्त्वाचे चाऱ्याचे पीक आहे. यामध्ये ८ ते ९ टक्के प्रथिने असतात. 

जमीन :  मध्यम ते भारी, चांगली निचरा होणारी जमीन या पिकास मानवते.

पूर्वमशागत :   एक नांगरट करावी. दोन कुळवाच्या पाळ्या देऊन जमीन भुसभुशीत करावी.

पेरणी :   पाभरीने ३० सें.मी. अंतरावर पेरणी करावी. हेक्‍टरी १०० किलो बियाणे वापरावे. पेरणीपूर्वी ॲझोटोबॅक्‍टर जीवाणू संवर्धक २५० ग्रॅम प्रति १० किलो बियाण्यास पेरणीपूर्वी चोळावे.

सुधारित जाती :  फुले हरिता, केंट, जे.एच.ओ.-८२२ या जातींचा वापर लागवडीसाठी करावा.

खते : पूर्वमशागतीच्या वेळेस प्रतिहेक्‍टरी १०-१२ बैलगाड्या शेणखत जमिनीत मिसळावे. प्रतिहेक्‍टरी ४० किलो नत्र, ५० किलो स्फुरद व ४० किलो पालाश पेरणीच्या वेळी द्यावे. पेरणीनंतर २५ दिवसांनी ४० किलो नत्र, तसेच पहिल्या कापणीनंतर ४० किलो नत्र प्रतिहेक्‍टरी द्यावे.

आंतरमशागत : पेरणीनंतर पहिली खुरपणी ३० दिवसांनी करून तणाचा प्रार्दुभाव होणार याची काळजी घ्यावी.

पाणी व्यवस्थापन : या पिकास १० ते १२ दिवसांनी पाणी देण्याची व्यवस्था करावी.

उत्पादन :  या पिकाचे दोन कापण्यांचे ५०० -६०० क्विंटल प्रतिहेक्‍टरी इतके उत्पादन मिळते.  संपर्क : सुधीर सूर्यगंध - ९८२२६११९३४ (लेखक डी. वाय. पाटील शिक्षण संस्थेचे कृषी विज्ञान केंद्र, तळसंदे, जि. कोल्हापूर येथे विषय विशेषज्ञ (पशुसंवर्धन) आहेत.)