सध्या १५ ते २० टक्के संत्रा बागांमध्ये फळगळीची समस्या दिसून येत आहे. प्रादुर्भावित बागांमध्ये फळगळीची समस्या प्रामुख्याने देठकूज करणाऱ्या कोलेटोट्रीकम/ बॉट्रोडीप्लोडिया बुरशीचा प्रादुर्भाव आहे. तसेच प्रयोगशाळेतील परीक्षणात अल्टरनेरिया बुरशीचा प्रादुर्भावही दिसून आला आहे. काही बागांमध्ये वायबहर( फळे वेडीवाकडी होणे) ची लक्षणे दिसत आहेत. काही फळांमध्ये एकसारखी रंगधारणा होत नाही. त्याचप्रमाणे काही फळांच्या देठाकडील भाग पिवळा व टोकाकडील भाग हिरवा दिसत आहे. पानांवर सूक्ष्म अन्नद्रव्य विशेषतः जस्त कमतरतेमुळे पिवळसर डाग दिसत आहेत. ही लक्षणे ग्रीनिंग या रोगांशी साधर्म दर्शवणारी आहेत. प्रादुर्भावित झाडांवर कार्बेन्डाझीम १ ग्रॅम किंवा थायोफेनेट मिथाईल १ ग्रॅम प्रतिलिटर पाण्यात मिसळून १० दिवसांच्या अंतराने दोन वेळा फवारणी करावी. २,४-डी १.५ ग्रॅम किंवा जी.ए.३ १.५ ग्रॅम, किंवा पोटॅशियम नायट्रेट १.५ किलो ग्रॅम किंवा युरिया १.५ किलो ग्रॅम प्रति १०० लिटर पाण्यात मिसळून १५ दिवसांच्या अंतराने फवारावे. झाडावरील वाळलेल्या फांद्यांच्या टोकाची छाटणी केल्यानंतर ताबडतोब बुरशीनाशकांची फवारणी करावी. हलक्‍या जमिनीत लागवड केलेल्या संत्रा बागेत हलके पाणी द्यावे. संत्रा झाड सुदृढ व रोगविरहित ठेवण्याकरिता मातीपरीक्षणाच्या शिफारशीनुसार मुख्य व सूक्ष्म अन्नद्रव्यांची मात्रा द्यावी. भारी चोपण माती असणाऱ्या भागामध्ये पाण्याचा निचरा करणे आवश्‍यक आहे. झिंक सल्फेट आणि फेरस सल्फेट प्रत्येकी २०० ग्रॅम झाडांच्या आळ्यातील मातीत चांगल्या प्रकारे मिसळावे. संपर्क : डॉ. दिनकरनाथ गर्ग,९८२२३६९०३० (राष्ट्रीय लिंबूवर्गीय फळ संशोधन संस्था, नागपूर )
