ऑर्चर्ड ट्रॅक्‍टरचे भाग्यवान विजेते ठरले अमरावतीचे मेघश्याम घोंगडे

आळंदी (जि. पुणे) : सकाळ-ॲग्रोवनच्या वतीने आयोजित सरपंच महापरिषदेमध्ये सरपंचांची उत्सुकता वाढवणाऱ्या लकी ड्रॉ स्पर्धेत अमरावती जिल्ह्यातील परलाम गावचे सरपंच मेघश्याम रमेशराव घोंगडे हे भाग्यवान विजेते ठरले. फोर्स मोटर्सकडून त्यांना ऑर्चर्ड ट्रॅक्‍टर भेट देण्यात येणार आहे. सरपंच महापरिषदेला उपस्थित असणाऱ्या सरपंचांमधून लकी ड्रॉ काढण्यात येतो. त्यानुसार यंदाही उद्‌घाटनाच्या मुख्य कार्यक्रमात मुख्यमंत्री देवेंद्र फडणवीस यांच्या हस्ते हा लकी ड्रॉद्वारे भाग्यवान विजेता निवडण्यात आला. त्यात मेघश्याम घोंगडे हे विजेते ठरले. 

मुख्यमंत्री देवेंद्र फडणवीस यांच्याहस्ते त्यांचा सन्मानचिन्ह, पुष्पगुच्छ आणि ट्रॅक्‍टरची प्रतीकात्मक चावी देऊन सन्मान करण्यात आला. या वेळी ग्रामविकासमंत्री पंकजा मुंडे, सकाळचे माध्यम समूहाचे अध्यक्ष प्रतापराव पवार, फोर्स मोटर्सचे ट्रॅक्‍टर्स विभागाचे बिझनेस हेड व वरिष्ठ उपाध्यक्ष प्रदीप धाडीवाल, ॲग्रोवनचे संपादक आदिनाथ चव्हाण, सरव्यवस्थापक प्रमोद राजेभोसले आदी उपस्थित होते.