आकारात फळे, भाज्यांचे काप...
भाजीपाला, फळ उत्पादक कंपन्या आपल्या उत्पादनांना ग्राहकांपर्यंत पोचविण्यासाठी दरवर्षी विविध कल्पना राबवीत असतात. युरोप, अमेरिकेतील काही कंपन्यांनी ताजा भाजीपाला, फळांचे काप विकण्यासाठी लहान मुलांचा आहारावर लक्ष केंद्रित केले आहे. एका फळे, भाजीपाला उत्पादक कंपनीने लहान मुलांच्या आहाराचा अभ्यास करून खास प्रकारचा भाजीपाला, फळांचे पॅकेट तयार केली. बहुतांश लहान मुले दररोज कच्चा भाजीपाला, फळे खाण्यास नाखूष असतात. परंतु त्यांच्या आरोग्यासाठी कच्चा भाजीपाला, फळे आहारात असणे महत्त्वाचे आहे. मुलांमधील खेळण्याची आवड लक्षात घेऊन कंपनीने फळे, भाजीपाल्याच्या चांदण्या, मुखवट्यांच्या आकारांत काप तयार केले. हे काप वैशिष्ट्यपूर्ण पॅकेट्समध्ये भरून बाजारपेठेत आणले. या उत्पादनाला ग्राहकांकडूनही चांगला प्रतिसाद मिळतो आहे. यामुळे भाजीपाला आणि फळांच्या मागणीत हळूहळू वाढ होताना दिसत आहे. खास लहान मुलांना समोर ठेवून रताळ्याचे कापही कंपनीने बाजारपेठेत आणले आहेत.
फ्रान्सच्या बाजारपेठेत
रवांडामधील अननस
फ्रान्समधील बाजारपेठेत वाळविलेल्या फळांच्या कापांना चांगली मागणी आहे. हे लक्षात घेऊन आफ्रिका खंडातील रवांडा देशातल्या शेतकऱ्यांच्या सहकारी संस्थेने सेंद्रिय पद्धतीने अननसाच्या उत्पादनाबरोबरीने वाळविलेले काप फ्रान्सच्या बाजारपेठेत निर्यात करण्यास सुरवात केली. यामुळे अननस उत्पादनांच्या उत्पन्नात चांगली वाढ झाली.
रवांडामधील गहरा विभागातील १३३ अननस उत्पादक शेतकरी सहकारी संस्थेचे सभासद आहेत. या शेतकऱ्यांनी ९० हेक्टरवर सेंद्रिय पद्धतीने अननस लागवड केली आहे. सहकारी संस्थेने उत्पादन तंत्रज्ञानाबरोबरीने फळांचे काप वाळविण्यासाठी प्रक्रिया केंद्र उभारले. या केंद्रामध्ये ताज्या अननसाचे काप केले जातात. शास्त्रीय पद्धतीने वाळवून चांगल्या पॅकिंगमध्ये भरले जातात. त्यामुळे हे काप वर्षभर टिकतात. दर महिन्याला दोन टन अननसाचे काप फ्रान्समध्ये निर्यात होत आहेत..
भाजीपाल्याचे नूडल्स...
अमेरिकेतील ग्राहकांकडून नूडल्सला चांगली मागणी आहे. पारंपरिक चवीच्या नूडल्स बनविण्यापेक्षा एका कंपनीने भाजीपाल्याचे आहारातील महत्त्व लक्षात घेऊन विविध प्रकारच्या भाजीपाल्यांचा वापर करत आरोग्यदायी नूडल्स हा प्रकार बाजारपेठेत आणला. या उत्पादनाला ग्राहकांकडून चांगलीच मागणी वाढली. गेल्या काही वर्षांत अमेरिकेत शाकाहारी खाद्य पदार्थांची बाजारपेठ विस्तारत आहे. ही संधी लक्षात घेऊन कंपनीने ग्राहकाच्या मागणीनुसार त्याच्या आवडीच्या भाजीपाल्याचा स्वाद असलेल्या नूडल्स बाजारपेठेत आणल्या आहेत.
