ग्रामपंचायतींमध्ये येणार ई-ग्रामसॉफ्ट प्रणाली

जिल्हाभरातील १,१५१ ग्रामपंचायतींमध्ये पुढचा कारभार आता संगणकावर चालणार असून, त्या संदर्भात ई-ग्रामसॉफ्ट प्रणाली कार्यरत केली जाणार आहे. हे कामकाज १ मेपासून ऑनलाइन असणार आहे, असे जिल्हा परिषदेच्या ग्रामपंचायत विभागाने म्हटले  आहे.       ग्रामपंचायतीच्या कारभारासाठी  ई-ग्रामसॉफ्ट प्रणाली विकसित केली आहे. येत्या १ एप्रिलपासून ग्रामपंचायतींचे दफ्तर संगणकीकृत करण्याचे काम वेगाने सुरू होईल. आर्थिक व्यवहारांच्या नोंदी व इतर नोंदणी, आवक जावक याच्या नोंदी ऑनलाइनच असतील. ग्रामपंचायतीकडून ग्रामस्थांना दिले जाणारे १ ते ३३ नमुने संगणकाद्वारे मिळतील. हे नमुने किंवा दाखले ग्राह्य धरले जातील. हस्तलिखित दाखले ग्राह्य धरले जाणार नाहीत. ग्रामपंचायतीचे जे दफ्तर उपलब्ध आहे, ते पूर्ण ऑनलाइन करावे लागेल. हे कामकाज १ मेपर्यंत पूर्ण करायचे आहे. दफ्तर पूर्णतः ऑनलाइन झाल्यानंतर दफ्तरची तपासणी करून ते सील केले जाईल. ग्रामपंचायतीमध्येच ते एका कपाटात ठेवले जाईल. पदाधिकारी व सदस्य यांच्या समक्ष त्यासंबंधीची कार्यवाही होईल. 

  ई - ग्रामसॉफ्ट प्रणालीचा फायदा   मालमत्ता करआकारणी, रहिवासी, वीजजोडणीसाठी ना हरकत, ना हरकत देय प्रमाणपत्र, शौचालय उपलब्धता, बांधकाम अनुमती, जन्म व मृत्यू नोंद, शासकीय योजनांचा लाभ, विवाह नोंदणी, दारिद्र्य रेषेखालील व्यक्ती, नोकरी व व्यवसायासाठी ना हरकत, वय, कुटुंब प्रमाणपत्र, वर्तणूक, नळजोडणी अनुमती, बेरोजगार प्रमाणपत्र, मालमत्ता फेरफार आदी दाखले या प्रणालीतून मिळतील. यासाठी वीस रुपये शुल्क ग्रामस्थाला नियमानुसार द्यावे लागणार आहे. हे दाखले तातडीने दिले जावेत, असे निर्देश देण्यात आले आहेत.