मनपाडळेच्या श्रमदानाला अनेकांचे हात

घुणकी, जि. कोल्हापूर :  मनपाडळे गावातील पाणीसमस्या सोडविण्यासाठी गावकरी एकवटले आहेत. विविध संस्था, घटकांच्या माध्यमातून आतापर्यंत ६५ हून अधिक नवीन बंधारे, १००हून अधिक चरांची खोदाई झाली आहे. १५ मेपासून मनपाडळेच्या डोंगरात साडेतीनशे एकरात जल, मृद संधारणाची कामे सुरू आहेत. लोकसहभागातून ४४० सलग समतल चर, ९० मातीचे बांध तयार करण्यात आले आहेत. गावाचे सुपुत्र आयएफएस अधिकारी संदीप सूर्यवंशी यांच्या पुढाकाराने जल, मृद संधारणाची चळवळ सुरू झाली. सूर्यवंशी यांनी वाढदिवसाचे औचित्य साधून गावाला जलसंधारणातून स्वयंपूर्ण करण्याचा संकल्प केला. त्यांच्या प्रेरणेने उपसरपंच रायबाराजे शिंदे, जयदीप सूर्यवंशी यांनी युवकांना संघटित करून जलसंधारणाच्या कामांचे नियोजन केले. गावकऱ्यांच्या बरोबरीने पंचायत समितीचे डॉ. प्रदीप पाटील, अशोकराव माने ग्रुपचे अध्यक्ष विजयसिंह माने, उद्योजक अनिल नानिवडेकर, राहुल माने यांनी जलमृद संधारणाच्या कामाला मदत केली आहे. कोल्हापूर, सांगली जिल्ह्यातील विविध संस्थांचे सदस्य गावकऱ्यांच्या साथीने श्रमदानात सहभागी झाले आहेत.