पीककर्ज वाटपात दिरंगाई, कॅनरा बॅंकेलाही दणका

पीककर्ज वाटपात दिरंगाई, कॅनरा बॅंकेलाही दणका
पीककर्ज वाटपात दिरंगाई, कॅनरा बॅंकेलाही दणका

अकोला ः पीककर्ज वाटपास टाळाटाळ करणाऱ्या कॅनरा बॅंकेला जिल्हाधिकारी आस्तिक कुमार पांडेय यांनी झटका दिला आहे. जिल्ह्यात या बॅंकेच्या असलेल्या सर्व शाखांमधील शासकीय खाती बंद करण्याबाबत यंत्रणांना निर्देश दिले आहेत. यापूर्वी पीककर्ज वाटपाच्या कारणावरून ॲक्‍सिस बॅंकेतून ४५ कोटी रुपये काढून घेण्यात आलेले आहेत.  जिल्हाधिकारी श्री. पांडेय हे शुक्रवारी (ता. १५) पातूर तालुक्‍यात पीककर्जाचा आढावा घेण्यासाठी गेले होते. त्या ठिकाणी त्यांना कॅनरा बॅंकेच्या पातूर शाखेतील अधिकारी, कर्मचारी हे पीककर्ज वाटपाबाबत हेतुपुरस्सरपणे दुर्लक्ष करीत आहेत. खातेदार शेतकऱ्यांना शासनाच्या महत्त्वाकांक्षी पीककर्ज योजनेपासून वंचित ठेवत आहेत. पात्र असूनही खातेदारांना कागदपत्रांची पूर्तता करण्यास सांगून जबाबदारी टाळत आहेत. बॅंकेची ही नकारात्मक भूमिका पाहता जिल्हाधिकाऱ्यांनी तीव्र नाराजी व्यक्त केली. त्यांनी या बॅंकेच्या जिल्ह्यात असलेल्या सर्व शाखांमधील शासकीय खाते बंद करून हे खाते पीककर्ज वाटपात उत्कृष्ट कामगिरी करणाऱ्या बॅंकेत उघडावेत असे आदेश दिले आहेत. या आदेशानंतर पातूरमधील सर्व शासकीय खाती शुक्रवारीच बंद करून पीककर्ज वाटप करणाऱ्या बॅंकेत उघडण्याची कार्यवाही सुुरू करण्यात आली.  अनावश्‍यक कागदपत्रे मागितल्यास फौजदारी  जिल्हाधिकाऱ्यांनी जिल्हा अग्रणी बॅंक व जिल्हा उपनिबंधकांना दिलेल्या एका आदेशाद्वारे पीककर्जासाठी शेतकऱ्याकडून अनावश्‍यक कागदपत्रे न घेण्याबाबत सुचविले आहे. सध्या पीककर्ज वाटपाचा मुद्दा ऐरणीवर आलेला आहे. खरीप हंगाम पेरण्या सुरू असून, शेतकरी बॅंकांकडून पीककर्जासाठी अर्ज देत आहेत. मात्र बॅंकांकडून शेतकऱ्यांना हैसियत दाखला, भूमी अभिलेख कार्यालयाकडून मिळणारा नकाशा, लीगल सर्च रिपोर्ट, रजिस्टर गहाणखत तसेच इतर अनावश्‍यक कागदपत्रांची मागणी करीत आहे. यामुळे शेतकऱ्यांना पीककर्ज मिळण्यास अडचणी निर्माण होत आहेत. बॅंकांच्या या आडकाठी धोरणामुळे शासनाची प्रतिमा मलीन होत चालली आहे. हे लक्षात घेता जिल्हाधिकाऱ्यांनी आदेश काढत उपरोक्त अनावश्‍यक दाखले न घेण्याबाबत लीड बॅंक व जिल्हा उपनिबंधकांनी त्यांच्या अधिनस्थ बॅंकांना सूचित करण्याचे सांगितले आहे. यापुढे या संदर्भात शेतकऱ्यांकडून तक्रारी दाखल झाल्या आणि त्यात तथ्य आढळले तर संबंधित बॅंक व्यवस्थापकाविरुद्ध फौजदारी गुन्हा दाखल करण्याचा इशारा जिल्हाधिकाऱ्यांनी दिला आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com