तूर उत्पादकांना दोन हजार बोनस न दिल्यास आंदोलन : बच्चू कडू

अमरावती ः तुरीची शासकीय हमीभाव खरेदी सुरू करावी किंवा तूर उत्पादकांना प्रतीक्‍विंटल दोन हजार रूपये बोनस देण्यात यावा, अन्यथा प्रहारच्या वतीने राज्यभर आंदोलन छेडण्याचा इशारा आमदार बच्चू कडू यांनी दिला.  तूर व हरभरा खरेदी चुकारे, पीकविमा, बोंड अळीच्या नुकसानीची भरपाई, गारपीट अनुदान या संदर्भाने आमदार कडू यांनी जिल्हाधिकारी अभिजीत बांगर यांच्या उपस्थितीत संबंधित अधिकाऱ्यांची बैठक घेतली. त्यानंतर पत्रकारांशी बोलताना त्यांनी ही माहिती दिली. आमदार कडू यांनी तूर व हरभरा चुकाऱ्याकरिता पालकमंत्री प्रवीण पोटे यांच्या निवासस्थानासमोर आंदोलन केले होते. या आंदोलनाची दखल घेत शासनाकडून २९१ कोटी रुपयांपैकी २०१ कोटी रुपयांचा निधी प्राप्त झाला. उर्वरित ९० कोटींपैकी ५० कोटी १४ जूनपर्यंत प्राप्त होणार असल्याचे कडू यांनी सांगितले.  दरम्यान, किती शेतकऱ्यांच्या खात्यात पैसे जमा झाले; याची माहिती त्यांनी आढावा बैठकीत घेतली. सर्वात आधी तूर विकणाऱ्या शेतकऱ्यांचा प्राधान्यक्रम ठरवून चुकारे दिले जात असल्याचे या वेळी जिल्हाधिकाऱ्यांकडून सांगण्यात आले. या वेळी प्रहारचे जिल्हा संपर्क प्रमुख प्रदीप वडतकर, जिल्हा प्रमुख छोटू महाराज वसू, महेंद्र जवंजाळ, मंगेश देशमुख, चंदू खेडकर, जोगेंद्र मोहोड, प्रदीप चौधरी, अनूप मारुळकर, नितीन व्यवहारे व इतरांची उपस्थिती होती. बॅंकांच्या तक्रारींसाठी २३ ला जनता दरबार पीकविमा, बोंड अळी, गारपीटची मदत त्यासोबतच कर्ज वितरणात बॅंकांकडून असहकार्य होत असल्याच्या शेतकऱ्यांच्या तक्रारी आहेत. त्यासाठी प्रहारच्या वतीने २३ जूनला अमरावती येथील शासकीय विश्रामगृहावर जनता दरबार घेण्यात येणार आहे. या वेळी शेतकऱ्यांनी त्यांच्या पीककर्जविषयक तक्रारी लेखी स्वरूपात देण्याचे आवाहन करण्यात आले आहे.