शरीरसुखाची मागणी करणारा गटसचिव अखेर गजाआड

दारव्हा, जि. यवतमाळ : पाच लाख रुपयांच्या कर्जासाठी महिलेकडे शरीरसुखाची मागणी करणाऱ्या गटसचिवाविरुद्घ गुन्हा नोंदविल्यानंतर अखेर त्याला मंगळवारी (ता.३) दारव्हा पोलिसांनी अटक केली. नायगाव येथे सोमवारी (ता. दोन) उघडकीस आलेल्या घटनेने सहकार वर्तुळात खळबळ उडाली आहे. दादाराव इंगोले, असे अटकेतील गटसचिवाचे नाव आहे. त्याला निलंबित करण्याची कार्यवाही प्रशासनाने तत्काळ हाती घेतली आहे. पीडित महिला नायगाव येथील रहिवासी असून, तिच्याकडे चार एक शेती आहे. शेतीपूरक जोडधंदा, दुग्ध व्यवसाय करण्यासाठी बॅंकेकडून कर्ज घेण्यासाठी पीडितेने महिला नातेवाईकाच्या माध्यमातून सदर गटसचिवाशी संपर्क साधला. गटसचिवाने पाच नव्हे तर, दहा लाख रुपये कर्ज देण्याचे आश्‍वासन दिले. पीडित महिलेने कागदपत्रांची पूर्तता करून प्रस्ताव दाखल केला. मात्र, त्याला पाच ते सहा महिन्यांचा कालावधी झाला. कर्ज मंजुरीबाबत महिलेने गटसचिवाला फोन केला असता, त्याने वारंवार शरीरसुखाची मागणी केली. हे संभाषण महिलेने मोबाईलमध्ये रेकॉर्ड केल्याने गटसचिवाचे बिंग फुटले. सोमवारी पीडितेने दारव्हा पोलिस ठाणे गाठून गटसचिवाविरुद्घ दारव्हा पोलिसांत तक्रार दिली. त्यावरून पोलिसांनी गुन्हा नोंदविल्यानंतर आज अटक केली.