पुणे ः गेल्या पाच वर्षापासून कृषी विद्यापीठांमार्फत चालविण्यात येणारा तीन वर्षांचा कृषी तंत्रनिकेतन पदविका अभ्यासक्रम लवकरच बंद करण्यात येणार आहे. गेल्या वर्षी जुलै महिन्यात या पदविकेला व्यावसायिक दर्जा मिळाला होता. तीन वर्षांच्या या पदविकेबाबत राज्यातील विद्यापीठांकडे अभिप्राय मागविण्यात आला होता. त्यावर चारही कृषी विद्यापीठांनी पदविका अभ्यासक्रम रद्द करण्याची मागणी महाराष्ट्र कृषी परिषदेकडे केली आहे. येत्या आठवडाभरात या निर्णयावर परिषदेकडून शिक्कामोर्तब झाल्यानंतर हा अभ्यासक्रम चालू शैक्षणिक वर्षापासून रद्द होणार आहे. राज्यात विविध ठिकाणी चारही कृषी विद्यापीठांतर्गत मराठी भाषेतून दोन वर्षांचा कृषी पदविका अभ्यासक्रम, तर सेमी इंग्रजी स्वरूपात तीन वर्षांचा कृषी तंत्रनिकेतन व चार वर्षांचा कालावधी असलेला कृषी पदवी अभ्यासक्रम चालविण्यत येतो. मात्र, जानेवारी महिन्यात शासनाने काढलेल्या निर्णयानुसार कृषी तंत्रनिकेतन हा तीन वर्षांचा अभ्यासक्रम चालू ठेवण्याबाबत कृषी विद्यापीठाच्या विद्यापरिषदांना अधिकार देण्यात आले होते. त्यानुसार कृषी विद्यापीठांनी हा पदविका अभ्यासक्रम पूर्णत रद्द करण्याची शिफारस परिषदेला केली आहे. त्यामुळे लवकरच या पदविका अभ्यासक्रम रद्द होण्यावर शिक्कामोर्तब होणार असून, या वर्षापासून पदविका अभ्यासक्रमासाठी प्रवेश प्रक्रिया राबविल्या जाणार नाहीत. तसेच यंदा २०१८-१९ या चालू वर्षापासून तीन वर्षांचा कृषी तंत्र निकेतन अभ्यासक्रम पूर्ण केलेल्या विद्यार्थ्यांना कृषी पदवीच्या दुसऱ्या वर्षात थेट प्रवेश घेता येणार नाही. राज्यात फक्त दोन वर्षांचा पदविका अभ्यासक्रम सुरू राहील.
जुलै २०१७ मध्ये कृषी शिक्षणाला व्यावसायिक दर्जा मिळाला आहे. त्यानुसार पदवीच्या प्रथम वर्षात केवळ सामाईक प्रवेश परीक्षा (सीईटी) पात्र झालेल्या विद्यार्थ्यांना प्रवेश घेता येणार आहे. दिल्ली येथील भारतीय कृषी संशोधन परिषदेने राज्यात २०१७-१८ पासून पाचव्या अधिष्ठाता समितीनुसार अभ्यासक्रमाची अंमलबजावणी केली आहे. कृषी विद्यापीठाच्या मते कृषी तंत्रनिकेतन पदविका पूर्ण केलेले विद्यार्थी हा नवीन अभ्यासक्रम पूर्ण करण्यासाठी पात्र ठरत नाही. तसेच शिक्षणाच्या गुणवत्तेसाठी याबाबत कठोर निर्णय घेणे आवश्यक असल्याचेदेखील विद्यापीठातील सूत्रांनी सांगितले.
दुसऱ्या, तिसऱ्या वर्षात प्रवेश मिळणार तीन वर्षांच्या सेमी इंग्रजी कृषी तंत्रनिकेतनच्या विद्यार्थ्यांना गेल्या वर्षी प्रवेश घेतलेल्या विद्यार्थ्यांना यंदा दुसऱ्या वर्षात आणि दुसऱ्या वर्षातील विद्यार्थ्यांना तिसऱ्या वर्षात प्रवेश मिळणार आहे. त्या संबंधीचा अभ्यासक्रम पुढील दोन वर्षांत पूर्ण करून घेतला जाणार आहे. मात्र, 2020-21 मध्ये हा पूर्ण अभ्यासक्रम बंद केला आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.