द्राक्षाला वर्षभरासाठी विमा सुरू करण्याची मागणी

सांगली ः एप्रिल छाटणी म्हणजेच खरड छाटणीनंतर जिल्ह्यात गारपिटीने द्राक्षाचे मोठ्या प्रमाणात नुकसान झाले आहे. द्राक्षासाठी शासनाची फळपीक विमा योजना ऑक्‍टोबर ते मार्चपर्यंत आहे. त्यानंतरच्या कालावधीसाठी हा विमा लागू होत नाही. परिमाणी गारपिटीने बाधित झालेल्या द्राक्षबागेला कोणत्याही प्रकारची मदत मिळणार नाही. त्यामुळे विमा वर्षभरासाठी सुरू करावा, अशी मागणी द्राक्ष उत्पादक शेतकऱ्यांकडून होते आहे.  शासनाने द्राक्ष पिकाला विमा संरक्षण दिले आहे. या माध्यमातून ऑक्‍टोबर ते ३० मार्चपर्यंत हा विमा लागू होतो. दरमान्य बाधित झालेल्या द्राक्ष उत्पादक शेतकऱ्यांना याचा कितपत फायदा होतो याबाबत प्रश्‍न उपस्थित होऊ लागला आहे. वास्तविक पाहता द्राक्षाची एप्रिल छाटणी (खरड छाटणी) केली जाते. या दरम्यान वादळी वाऱ्यासह गारपीट झाल्यास हा विमा बाधित झालेल्या द्राक्षबागेला लागू होत नाही. त्यामुळे शेतकऱ्यांचे मोठे नुकसान आहे.  जिल्ह्यात यंदा एप्रिल छाटणी म्हणजे खरड छाटणी पूर्ण झाली. चांगले फुटवे आले. मात्र, गेल्या पंधरा दिवसापूर्वी तासगाव आणि पलूस तालुक्‍यात वादळी वाऱ्यासह गारपीट झाली. यामुळे सुमारे २ हजार एकर क्षेत्र बाधित झाले. हे फुटवे पूर्ण वाया गेले. या फुटव्यांची ऑक्‍टोबरमध्ये फळ छाटणी होते. त्यानंतर फळधारणा, मात्र आता फुटवेच मोडून पडले तर फळधारणा होणार कशी ? नवे फुटवे घ्यावेत, तर वेळ पुढे जाते. त्यामुळे प्रचंड मोठ्या नुकसानीला शेतकऱ्यांना सामोरे जावे लागले.  मात्र, शासनाच्या नियमाप्रमाणे या काळात संरक्षण मिळाले नाही. यामुळे केवळ तासगाव तालुक्‍यात सुमारे २५ कोटी रुपयांचे नुकसान झाले आहे. त्यामुळे द्राक्ष पिकाला वर्षभर विमाच्या सरंक्षण मिळावे, अशी मागणी होऊ लागली आहे. गेल्या महिन्यापूर्वी तासगाव तालुक्‍यात शिवसेना प्रमुख उद्धव ठाकरे यांनी अवकाळीने नुकसान झालेल्या द्राक्षबागेची पाहणी केली होती. या वेळी त्यांनी ‘‘वर्षभरासाठी विम्याचे संरक्षण देण्याबाबत कृषिमंत्र्यांशी चर्चा करून मार्ग काढू’’, असे आश्‍वासन दिले होते. मात्र, अद्यापही त्याबाबत कोणत्याही हालचाली झालेल्या दिसत नाहीत.