सांगलीच्या हळदीला ‘जीआय’ मानांकन

सांगली ः आंतरराष्ट्रीय बाजारपेठेत सांगलीची हळद प्रसिद्ध आहे. केंद्रीय पेटंट कार्यालयाकडून मंगळवारी (ता. २६) ‘सांगलीची हळद’ म्हणून पेटंट मिळाले. सांगलीच्या हळदीला स्वतःची ओळख निर्माण करून देणारे जीआय मानांकन मिळाल्याने आंतरराष्ट्रीय बाजारपेठेत हळदीची निर्यात होण्यास संधी उपलब्ध झाली आहे, अशी माहिती गणेश हिंगमिरे यांनी दिली. जिल्ह्यात हळदीचे उत्पादन घेतले जाते. त्याचप्रमाणे हळद ठेवण्यासाठी हरिपूर येथे पेवांचा वापर केला जातो. त्यामुळे हळदची प्रतवारी चांगली राहण्यास मदत होते. इथल्या हळदीची प्रतवारी, रंग आणि टिकाऊपणा यामुळे प्रा. गणेश हिंगमिरे यांनी सन २०१३ मध्ये प्रथम मुंबई कार्यालयाकडे पेटंटसाठी अर्ज दाखल केला होता. दरम्यानच्या काळात सांगली परिसरातील हळद उत्पादकाबरोबर राहून प्रा. हिंगमिरे त्यांनी पाठपुरावा केला. सांगली परिसरातील हळदीची केसरी रंग, पेवातील साठवणूक आणि अन्य माहिती त्या प्रस्तावात होती. या प्रस्तावावर मंगळवारी (ता. २६) सुनावणी झाली. अखेर पेटंट मिळाले. ‘सांगलीची हळद’ या नावाखाली अन्य कोणत्याही हळदेची विक्री करता येणार नाही. यापूर्वी सांगलीच्या हळदीला भौतिक संपदेचे पेटंट मात्र नव्हते. पुण्याचे प्रा. हिंगमिरे यांनी पाच वर्षांपासून प्रयत्न सुरू केला होता. अखेर केंद्रीय पेटंट कार्यालयाकडून मंगळवारी ‘सांगलीची हळद’ म्हणून पेटंट मिळाले. यामुळे सांगलीचे नाव पुन्हा एकदा जगाच्या नकाशावर झळकणार आहे. हळदीला जीआय मानांकन नसल्याने सांगलीच्या हळदीचा ब्रॅंड नसल्याने अनेक अडचणी निर्माण होत होत्या. हळदीचा ब्रॅंड होणे फार महत्त्वाचे होते. आता हळदीला जीआय मानांकन मिळाले आहे. आपल्याला ब्रॅंडिंगद्वारे हळदीला आंतरराष्ट्रीय बाजार पेठ काबिज करणे शक्‍य होणार आहे. आता जिल्ह्यातील शेतकऱ्यांनी एकत्र येणे महत्त्वाचे आहे. पेटंटचे फायदे....