औरंगाबाद : मराठवाड्यातील लघुप्रकल्पांसह तेरणा, मांजरा, रेणा नदीवरील बंधाऱ्यांमधील उपयुक्‍त पाणीसाठ्यात किंचित वाढ झाल्याचे चित्र पाहायला मिळते आहे. या वाढीमुळे मराठवाड्यातील एकूण ८६७ प्रकल्पांमधील उपयुक्‍त पाणीसाठा गत आठवड्याच्या तुलनेत ०.२५ टक्‍क्‍यांनी का होईना वाढल्याची स्थिती आहे.
मराठवाड्यातील ११ मोठ्या प्रकल्पात गत आठवड्यात असलेला १२.१२ टक्‍के उपयुक्‍त पाणीसाठा २२ जूनअखेर कायम होता. दुसरीकडे ७५ मध्यम प्रकल्पात गत आठवड्यात असलेल्या ११.२४ टक्‍के उपयुक्‍त पाणीसाठ्यात ११.५८ टक्‍क्‍यांपर्यंत वाढ झाली आहे. ७४६ लघुप्रकल्पात आधी ७.६९ टक्‍के असलेला उपयुक्‍त पाणीसाठा ८.८४ टक्क्यांवर जाऊन पोहाेचला आहे. तेरणा, मांजरा, रेणा नदीवरील २४ बंधाऱ्यांत २१.३६ टक्‍के असलेला उपयुक्‍त पाणीसाठा वाढून २२ जूनअखेर २२.५१ टक्क्यांवर आला होता. ११ मोठ्या प्रकल्पांपैकी दहा प्रकल्पांत २५ टक्‍क्‍यांपेक्षा कमी उपयुक्‍त पाणीसाठा असून, अकरापैकी येलदरी, सिद्धेश्वर, उर्ध्व पेनगंगा व सीनाकोळेगाव या मोठ्या प्रकल्पात उपयुक्‍त पाण्याचा थेंबही नाही.
७५ पैकी ६२ मध्यम प्रकल्पात २५ टक्‍क्‍यांपेक्षा कमी उपयुक्‍त पाणीसाठा आहे. ११ मध्यम प्रकल्पांत २५ ते ५० टक्‍केच उपयुक्‍त पाणीसाठा शिल्लक आहे. एका मध्यम प्रकल्पात ५० ते ७५ टक्‍के तर एका प्रकल्पात ७५ टक्‍क्‍यांपेक्षा जास्त उपयुक्‍त पाणीसाठा शिल्लक आहे. २२ जूनअखेरपर्यंत औरंगाबाद जिल्ह्यातील सर्वच्या सर्व सोळा मध्यम प्रकल्पांतील उपयुक्‍त पाणीसाठा शून्य टक्क्यांवर आला आहे.
गतवर्षीच्या तुलनेत यंदा सर्व मध्यम प्रकल्पांमध्ये उपयुक्‍त पाणीसाठ्यात तीन टक्‍के घट नोंदली गेली आहे. ७४६ लघुप्रकल्पांपैकी ६८२ लघुप्रकल्पात २५ टक्‍क्‍यांपेक्षा कमी उपयुक्‍त पाणीसाठा आहे. ४२ प्रकल्पात २५ ते ५० टक्‍के, तर १५ प्रकल्पात ५० ते ७५ टक्‍के उपयुक्‍त पाणीसाठा शिल्लक आहे. ७ प्रकल्पांत ७५ टक्‍क्‍यांपेक्षा जास्त उपयुक्‍त पाणीसाठा असून, त्यामध्ये सर्वाधिक ५ प्रकल्प उस्मानाबादमधील आहेत. गतवर्षी जनूच्या तिसऱ्या आठवड्यातही केवळ ९ टक्‍के उपुक्‍त पाणीसाठा मराठवाड्यातील लघुपाटबंधाऱ्यांमध्ये कायम होता. यंदा तेवढाच पाणीसाठा २२ जनूअखेर कायम होता. लातूर व नांदेड जिल्ह्यांतील प्रत्येकी एका लघुप्रकल्पात ७५ टक्‍क्‍यांपेक्षा जास्त उपयुक्‍त पाणीसाठा शिल्लक असल्याची माहिती जलसंपदा विभागाच्या सूत्रांनी दिली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.