खरिपाची पेरणी ९३ लाख हेक्टरवर

नवी दिल्ली ः देशात यंदा वेळेवर मॉन्सून दाखल झाल्यानंतर पेरण्यांनी वेग घेतला आहे. आतापर्यंत खरिपाच्या ९३ लाख हेक्टवर पेरण्या झाल्या आहेत. मागील वर्षी याच काळात ९४ लाख हेक्टरवर पेरणी झाली होती. यंदा एक लाख हेक्टरने पेरा माघाराला आहे, अशी माहिती केंद्रीय कृषी विभागाने दिली आहे. देशात मॉन्सून यंदा वेळेच्या आधीच दाखल झाल्याने शेतकऱ्यांनी पेरणी करण्याला प्राधान्य दिले. मात्र, अनेक भागांत रब्बीची पिके शेतात उभी असताना अवकाळी पावसाने हजेरी लावली. त्यामुळे ही पिके काढण्यास उशीर झाला. त्यामुळे खरीप परेणीला उशीर होत आहे. देशात खरीप हंगामात आतापर्यंत साधारणतः ९१ लाख हेक्टरवर पेरा होत असतो. यापेक्षा सध्या थोडा जास्त पेरा झाला आहे. खरिपातील महत्त्वाचे पीक म्हणजेच भाताची यंदा पेरणी वाढली असून, सध्या ६ लाख ९३ हजार हेक्टरवर लागवड झाली आहे. मागील वर्षी ६ लाख ८७ हजार हेक्टरवर लागवड झाला होता.      देशात कडधान्य पेरणी कमी झाली. हुलगा पिकाची पेरणी मागील वर्षीपेक्षा कमी झाली आहे, तर उडीद, मूग आणि इतर कडधान्यांची पेरणी घटली आहे. खरिपातील आणखी एक महत्त्वाचे पीक मक्याची पेरणी २३ टक्क्यांनी घटली आहे. मागील वर्षी मक्याला कमी दर मिळाल्याने यंदाच्या हंगामात मका पेरणी घटली आहे. यंदा शेतकरी मोठ्या प्रमाणात भात लागवडीकडे वळाले आहेत. मक्याची ४ लाख ९१ हजार हेक्टरवर पेरणी झाली आहे.  कडधान्याचा पेरा घटला मागील हंगामात देशात कडधान्याचे विक्रमी उत्पादन झाले होते. त्यामुळे बाजारात आवक वाढताच त्याचा परिणाम दरावर होऊन दर हमीभावाच्या खुपच खाली गेले होते. तसेच शासकीय खरेदीसाठी देशभरात शेतकऱ्यांना अनेक अडचणीचा सामना करावा लागला होता. त्यामुळे २०१८-१९ च्या हंगामात शेतकरी कडधान्याचा पेरा कमी करतील, अशी शक्यता आधीच वर्तविण्यात आली होती. अपेक्षेप्रमाणे आतापर्यंत झालेल्या खरिपाच्या पेरणीमध्ये कडधान्याचा पेरा घटला आहे. कडधान्याकडून शेतकरी यंदा इतर पिकांकडे वळाले आहेत. आतापर्यंत खरिपात २ लाख ५२ हजार हेक्टरवर पेरणी झाली आहे. मागील वर्षी आतापर्यंत २ लाख ८० हजार हेक्टरवर पेरणी झाली होती. पीकनिहाय झालेली पेरणी (हेक्टरमध्ये)