कर्जमाफीच्या याद्या बॅंकेबाहेर लावा

परभणी  : छत्रपती शिवाजी महाराज शेतकरी सन्मान योजनेअंतर्गत जिल्ह्यातील कर्जमाफी मिळालेल्या शेतकऱ्यांच्या याद्या बॅंकांच्या शाखेबाहेर लावाव्यात. शेतकऱ्यांना तत्काळ पीक कर्जवाटप करण्यात यावे, या मागण्यांसाठी स्वाभिमानी शेतकरी संघटनेतर्फे जिल्हा अग्रणी बॅंकेच्या कार्यालयामध्ये मंगळवारी (ता.१९) ठिय्या आंदोलन करण्यात आले. या वेळी कार्यकर्त्यांनी दुपारचे जेवण बॅंकेतच केले. कर्जमाफीचा लाभ मिळालेल्या शेतकऱ्यांच्या याद्या जिल्ह्यातील बॅंकांमध्ये लावण्यात आल्या नाहीत. बॅंकांच्या शाखांमध्ये जाऊन कर्जमाफी बाबत विचारणा केली असता लाभार्थी शेतकऱ्यांना बॅंक कर्मचाऱ्यांकडून माहिती देण्यास टाळाटाळ केली जात आहे. खरिपाच्या पेरणीसाठी बि, बियाणे, खते खरेदी करण्यासाठी शेतकऱ्यांकडे पैसे नाहीत. बॅंकेकडून पीक कर्ज घ्यावे की सावकारांकडून कर्ज घ्यावे अशा संमभ्रमावस्थेत शेतकरी आहेत. त्यामुळे कर्जमाफी मिळालेल्या सर्व शेतकऱ्यांच्या याद्या बॅंकेबाहेर लावाव्यात. पात्र शेतकऱ्यांना तत्काळ पीक कर्जवाटप करावे, अशी मागणी सातत्याने करूनही त्याकडे संबंधीत यंत्रणांनी दुर्लक्ष केले. त्यामुळे मंगळवारी (ता.१९) स्वाभिमानी शेतकरी संघटनचे जिल्हाध्यक्ष किशोर ढगे, रामभाऊ आवरगंड, केशव आरमळ, भगवान शिंदे, डिगंबर पवार, शिवाजी ढगे, बालाजी मोहिते, राहुल मस्के, रामकिशन गरुड, गजानन गरुड, राजू शिंदे, अजित पवार, भास्कर खटिंग, पांडुरंग आवचार आदींनी जिल्हा अग्रणी बॅंकेच्या कार्यालयात ठिय्या आंदोलन केले. तलाठी, ग्रामसेवक, कृषी सहाय्यका मार्फत गावांमध्ये कर्जमाफी मिळालेल्या शेतकऱ्यांच्या याद्या उपलब्ध करून देण्यात येत असल्याचे लेखी आश्वासन अग्रणी बॅंकेचे व्यवस्थापक तुकाराम खिल्लारे यांनी दिल्यानंतर आंदोलन मागे घेण्यात आले.