खासगी डेअरीचालकांनी दुधाचे विक्री दर घटविले

पुणे: आंतरराष्ट्रीय पातळीवरील दूध पावडच्या घसरलेल्या दरानंतर सरकार काहीतरी मदत करेल, या आशेवर असलेल्या खासगी दूध डेअरी व्यावसायिकांची निराशा झाली. त्यानंतर दुधाचे खरेदी दर कमी झाल्यामुळे विक्रीचे दरदेखील प्रतिलिटर चार रुपयांनी कमी करण्याचा महत्त्वपूर्ण निर्णय राज्यातील आघाडीच्या खासगी दूध डेअरीचालकांनी घेतली आहे.  राज्यात अंदाजे ८० लाख लिटर्स दुधाची खरेदी खासगी डेअरीचालकांकडून केली जाते. त्यातील ६० लाख लिटर्स दुधाची पिशवीतून विक्री होते. विविध अशा ७० ब्रॅंडखाली पिशवीबंद दूध विकले जात असून आतापर्यंत त्यातील नामांकित १५ ब्रॅंडने आपल्या दुधाचे विक्री दर घटविले आहेत.  बारामतीमध्ये राज्यातील प्रमुख डेअरीचालकांच्या झालेल्या बैठकीत हा निर्णय घेण्यात आलेला आहे. यामुळे ग्राहकांना गायीचे दूध आता प्रतिलिटर सरासरी ४० ते ४२ रुपयांऐवजी ३६ ते ३८ रुपये दराने मिळणार आहे. ‘‘दूध खरेदीदर वाढविणे शक्य नसल्याने कमी झालेल्या दराचा फायदा ग्राहकांना देण्यासाठी विक्री दर कमी करण्याचा विचार हाेता. कमी केलेल्या सुधारित दराप्रमाणे येत्या १६ जूनपासून ग्राहकांना स्वस्तात दुधाची विक्री सुरू होईल. यामुळे राज्यातील पिशवीबंद दुधाची विक्री वाढेल. राज्यात ७० खासगी डेअरी असून, टप्प्याटप्प्याने सर्वांनी विक्री दर कमी केले तर दुधाची विक्री वाढुन, अतिरिक्त दुधाचा प्रश्‍न कमी हाेईल.’’, असे महाराष्ट्र राज्य राज्य दूध उत्पादक व प्रक्रिया व्यावसायिक संघाचे सचिव प्रकाश कुतवळ यांनी सांगितले.  ‘‘गेल्या काही दिवसांपासून दूध भुकटीचे दर कोसळल्याने डेअरीचालकदेखील अडचणीत आलेले होते. त्यामुळे खरेदीचे दर कमी झाले होते आणि शेतकऱ्यांना दर वाढवून देण्याची मागणी होत असतानाही तसे करणे शक्य होत नव्हते. तसेच, दुसऱ्या बाजूला दूधविक्रीचे कमिशन आणि दूध विक्रेत्यांना विविध स्किमदेखील चालू होत्या. त्यामुळे या सर्व समस्यांवर उपाय म्हणून डेअरीचालकांनी विक्रीचे दर कमी मार्ग स्विकारला आहे", असेही श्री. कुतवळ म्हणाले.  पहिल्या टप्प्यात सोनई, गोविंद, स्वराज, ऊर्जा, किसान, नेचर, स्वयंभू, शांताई, अनंत, शिवप्रसाद, जे. डी. थोटे, नॅचरल, कन्हैया, गोशक्ती असे ब्रॅंडने दुधाचे दर कमी करण्यास संमती दर्शविली आहे. खासगी डेअरीचालकांनी दुधाचे दर कमी केल्यामुळे अमूल तसेच इतर सहकारी संघांच्या दुधाचे ब्रॅंडदेखील आपल्या किमती घटवतील, अशी माहिती सूत्रांनी दिली. गायीच्या दुधाचे डेअरीपोच दरदेखील घटले दूध उत्पादक शेतकरी विनोद कोडीतकर यांनी सांगितले, की मंगळवारपासून काही डेअरीचालकांनी शेतकऱ्यांकडून डेअरी पोहच दुधाचे दर अजून दोन रुपयांनी कमी केले आहेत. शेतकऱ्यांकडून त्यामुळे १७ रुपयांनी खासगी संकलक खरेदी करून त्याची विक्री डेअरीचालकांना २० रुपयांनी करीत आहेत. यापूर्वी २० रुपयांनी शेतकऱ्यांकडून संकलक खरेदी करीत होते व त्याची विक्री डेअरीचालकांना २१ ते २१.५० केली जात होती.