राज्यात कमाल तापमानात दोन अंशांपर्यंत वाढ

पुणे: राज्यातील अनेक भागांत माॅन्सूनने उघडीप दिल्याने कमाल तापमानाचा पारा एक ते दोन अंश सेल्सिअसने वाढला आहे. मध्य महाराष्ट्रातील जळगाव येथे गुरुवारी (ता. १४) सकाळपर्यंतच्या चोवीस तासांमध्ये उच्चांकी ४०.० अंश सेल्सिअसची उच्चांकी तापमानाची नोंद झाली असल्याचे हवामान विभागाच्या सूत्रांनी सांगितले.  गेल्या पाच ते सहा दिवसांपासून राज्यातील माॅन्सूनची गती थंडावली आहे. त्यामुळे कोकण, मध्य महाराष्ट्र, मराठवाडा व विदर्भातील काही भागात ऊन सावल्याचा खेळ सुरू आहे. त्यामुळे दुपारी वातावरणात उकाडा वाढत आहे. परिणामी कमाल तापमानात किंचित वाढ झाली आहे. येत्या सोमवार ते मंगळवारपर्यत राज्यातील पावसाची गती मंदावणार आहे. त्यानंतर वातावरणात पोषक हवामान तयार झाल्यास कोकण परिसरात अधूनमधून हलक्या सरी बरसण्याची शक्यता आहे.   गेल्या चोवीस तासामध्ये पावसाने उघडीप दिल्याने गुरुवारी सकाळपर्यंतच्या चोवीस तासामध्ये कुठेही पावसाची नोंद झालेली नाही. ढगाळ वातावरणामुळे तापमानाचा पारा खाली उतरला असला तरी पावसाने उघडीप दिल्याने पुन्हा हळूहळू वाढू लागला आहे. विदर्भातील बुलढाणा येथील कमाल तापमानात सरासरीच्या तुलनेत तीन अंश सेल्सिअसने वाढ होत ३८.२ अंश सेल्सिअस तापमानाची नोंद झाली आहे. जळगाव, मालेगाव, सांताक्रुझ, रत्नागिरी, डहाणू, औरंगाबाद येथील कमाल तापमानात सरासरीच्या तुलनेत एक अंश सेल्सिअसने वाढ झाली आहे. तसेच उर्वरित भागात एक ते दोन अंश सेल्सिअसने घट झाली आहे.  तीन-चार दिवस माॅन्सून संथच राहणार  सध्या पोषक वातावरण नसल्याने माॅन्सूनची गती संथच राहणार आहे. पुढील तीन ते चार दिवस ही स्थिती कायम राहणार आहे. पुढील आठवड्यात माॅन्सूनच्या प्रगतीत किंचित वाढ होऊन राज्यात पुन्हा माॅन्सून सक्रिय होण्याचे संकेत आहेत. त्यामुळे पुढील आठवड्यात कोकण किनारपट्टीवर पावसाच्या हलक्या बरसतील अशी शक्यता हवामान विभागाच्या सूत्रांनी वर्तविली आहे. गुरुवारी (ता. १४) सकाळी आठ वाजेपर्यंतच्या चोवीस तासातील कमाल तापमान (अंश सेल्सिअस) : मुंबई ३२.२,  सांताक्रूझ ३४.०, अलिबाग ३३.६, रत्नागिरी ३१.७,डहाणू ३२.८, पुणे ३२.६, नगर ३६.४, जळगाव ४०.०, कोल्हापूर ३०.९, महाबळेश्वर २१.५, मालेगाव ३८.२, नाशिक ३२.६, सांगली ३२.२, सातारा ३१.३, सोलापूर ३५.३, औरंगाबाद ३६.५, उस्मानाबाद ३३.४, परभणी शहर ३६.९, नांदेड ३५.०, अकोला ३८.६, अमरावती ३७.०, बुलढाणा ३८.२, ब्रम्हपुरी ३७.५, चंद्रपूर ३९.०, गोंदिया ३७.०, नागपूर ३७.७, वाशीम ३७.०, वर्धा ३७.९, यवतमाळ ३६.५.