मॉन्सून कोकणच्या वेशीवर
मॉन्सून कोकणच्या वेशीवर

मॉन्सून कोकणच्या वेशीवर

पुणे : नैर्ऋत्य मोसमी वाऱ्यांनी (मॉन्सून) गुरुवारी (ता. ७) कर्नाटकची संपूर्ण किनारपट्टी व्यापून महाराष्ट्राच्या वेशीवर असलेल्या गोव्यापर्यंत धडक दिली आहे. गोव्यातील मार्मागोवा, कर्नाटकातील गदगपर्यंत मॉन्सून पोचल्याचे हवामान विभागाने जाहीर केले. आज (ता. ८) महाराष्ट्रातील मॉन्सूनचे प्रवेशद्वार असलेल्या कोकणासह दक्षिण महाराष्ट्राच्या काही भागात माॅन्सून दाखल होण्याची शक्यता आहे.  बुधवारी (ता.६) मॉन्सूनने उत्तरेकडील प्रवास सुरू करत अांध्र प्रदेशच्या कर्नूल, नरसापूर, मच्छलीपट्टणमपर्यंतचा टप्पा पूर्ण केला होता. तर गुरुवारी मॉन्सूनने गोव्यापर्यंत मजल मारली आहे. आज शुक्रवारीअंतर्गत कर्नाटक, रायलसीमाचा उर्वरित भाग व्यापून मध्य अरबी समुद्र, दक्षिण महाराष्ट्र, तेलंगणच्या काही भागांत माॅन्सून दाखल होण्यास अनुकूल स्थिती आहे, तर शनिवारपर्यंत (ता. ९) महाराष्ट्र, तेलंगणच्या आणखी काही भागात माॅन्सून दाखल होईल, तर सोमवारपर्यंत (ता. ११) संपूर्ण महाराष्ट्र, अरबी समुद्राचा बहुतांशी भाग, गुजरात, मध्य प्रदेश, छत्तीसगड, आेडिशा, पश्‍चिम बंगाल, सिक्कीमपर्यंत मॉन्सून पोचण्याचे संकेत आहेत. 

बंगालच्या उपसागराच्या उत्तर भागात आज (ता. ८) हवेचे कमी दाबाचे क्षेत्र तयार होणार आहे. माॅन्सूनच्या उत्तरेकडील वाटचालीस या कमी दाब क्षेत्रामुळे गती मिळण्याची शक्यता आहे. शनिवारपर्यंत (ता. ९) या कमी दाब क्षेत्राची तीव्रता वाढून ते वायव्येकडे सरकण्याचे संकेत आहेत. यामुळे उत्तर ओडिशा, पश्‍चिम बंगाल, सिक्कीम, आसाम व मेघालयात पावसाचा जोर वाढून, या भागातही माॅन्सून दाखल होईल. दरम्यान पश्‍चिम बंगाल, ओडिशाच्या किनाऱ्यालगत जोरदार वारे वाहून समुद्र खवळण्याची इशारा देण्यात आला आहे.   कोकणात रविवारपर्यंत धुवाधार पाऊस  माॅन्सूनच्या आगमनास अनुकूल स्थिती निर्माण होत असल्याने रविवारपर्यंत (ता. १०) मुंबईसह कोकणात, तर शनिवारपर्यंत (ता.९) कोल्हापूर, सांगली, साताऱ्यासह दक्षिण अंतर्गत महाराष्ट्रात अनेक ठिकाणी, तर उत्तर महाराष्ट्रात तुरळक ठिकाणी धुवाधार पाऊस पडण्याची शक्यता आहे. विदर्भ, मराठवाड्यातही काही ठिकाणी वादळी वाऱ्यासह पाऊस पडण्याचा अंदाज आहे. कोकण किनाऱ्यालगत ताशी ४० ते ६० किलोमीटर वेगाने वारे वाहणार आहे. या वाऱ्यामुळे समुद्र खवळून उंच लाटा उसळणार असल्याने मासेमारीसाठी समुद्रात न जाण्याचा इशारा देण्यात आला आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com