मॉन्सून २३ला अंदमानात; २९ मे रोजी केरळात

पुणे : देशभरातील शेतकरी आतुरतेने वाट पाहत असलेल्या नैर्ऋत्य मोसमी वाऱ्यांचे (मॉन्सून) २९ मे रोजी केरळात आगमन होणार आहे. त्यापूर्वी २३ मे रोजी माॅन्सून अंदमान निकोबार बेटांवर दाखल होणार आहे. अंदमानात नियोजित वेळेच्या तीन दिवस उशिराने येणारा मॉन्सून केरळमध्ये तीन दिवस अगोदर येणार असल्याचे हवामान विभागाने स्पष्ट केले आहे. मॉन्सून केरळमध्ये साधारणत: १ जून रोजी दाखल होत असतो. मात्र मॉन्सूनचे आगमनात सात दिवस आगोदर किंवा उशिरा होण्याची शक्यता असते. 

मॉन्सून केरळमध्ये दाखल झाल्यानंतर देशातील पावसाच्या हंगामाला सुरवात झाली, असे मानले जाते. त्यानंतर मॉन्सून मजल दरमजल करत उत्तरेकडे प्रगती करतो. यंदा नियोजित वेळेच्या तीन दिवस आगोदर म्हणजे २९ मे रोजी मॉन्सून केरळात दाखल होणार आहे. 

भारतीय हवामान विभाग २००५ पासून मॉन्सून केरळात दाखल होण्याविषयी अंदाज व्यक्त करत आहे. या अंदाजात ४ दिवसांची तफावत गृहीत धरली जाते. २००५ ते २०१७ या १३ वर्षांच्या कालावधीत २०१५ हे वर्ष वगळता हवामान विभागाचा मॉन्सूनविषयीचा अंदाज अधिक अचूक आला आहे. २०१५ मध्ये माॅन्सून वारे ३० मे रोजी केरळात दाखल होतील असा अंदाज होता, मात्र प्रत्यक्षात तो ५ जून रोजी केरळात डेरेदाखल झाला होता.    मॉन्सून दाखल होण्यासाठी सहा मानके लक्षात घेतली जातात. यात दक्षिण द्वीपकल्पावर होणारा पूर्वमोसमी पाऊस, दक्षिण चीन सागरातून बाहेर पडणारे दीर्घ किरणोत्सर्ग, अाग्नेय हिंद महासागरावरील हवेच्या खालच्या स्तरातील वारे, विषुववृत्तीय पूर्व हिंद महासागरातील वरच्या स्तरातील वारे, नैर्ऋत्य प्रशांत महासागरातील बाहेर पडणारे दीर्घ किरणोत्सर्ग यांचा अभ्यास केला जातो.   अंदमानात उशिराने आगमन मॉन्सून साधारणत: १५ मे रोजी दक्षिण अंदमान समुद्रात तर २० मे रोजी अंदमान निकोबार बेटांपर्यंत पोचतो. दक्षिण अंदमान समुद्रात मॉन्सून दाखल झालेला नसल्याने यंदा अंदमान निकोबार बेट समूहावर उशिरा येण्याचा अंदाज हवामान विभागाने वर्तविला होता. त्यानुसार यंदा अंदमानातील मॉन्सूनचे आगमन तीन दिवसांनी लांबणार अाहे. यंदा २३ मे राेजी अंदमानात पोचणार असल्याचे हवामान विभागाने म्हटले आहे.  गेल्या पाच वर्षांतील मॉन्सूनचे केरळातील आगमन