माॅन्सूनची प्रगती शनिवारनंतर ?

पुणे : जवळपास आठवडाभरापासून नैऋत्य मोसमी वाऱ्यांची प्रगती थांबल्याने राज्याच्या अनेक भागांत पावसाने जोर धरलेला नाही. विषुववृत्ताकडून येणारे वाऱ्यांचे प्रवाह सुरळीत होण्यासाठी पोषक स्थिती निर्माण होऊ लागल्याने शनिवारनंतर (ता. २३) महाराष्ट्रासह देशाच्या पूर्व भागात मॉन्सूनची प्रगती शक्य असल्याचे हवामान विभागाने स्पष्ट केले आहे. विषुववृत्ताकडून येणाऱ्या वाऱ्यांचा वेग कमी होणे, माॅन्सूनच्या वाटचालीसाठी आवश्‍यक ‘मेडन जुलिअन ऑस्सिलेशन’ (एमजेओ)ची प्रतिकूल स्थिती, मध्य आणि पूर्व प्रशांत महासागर, पश्‍चिम गोलार्ध, आफ्रिकेलगत पूर्वेकडे जाणारे प्रवाह, वायव्य प्रशांत महासागरात हवेचे कमी झालेले दाब यामुळे मॉन्सूनवर परिणाम झाला. वाऱ्यांचे प्रवाह मंदावल्याने मॉन्सूनची महाराष्ट्रातील वाटचाल ११ जूनपासून जैसे थे आहे. विदर्भ, मराठवाड्याच्या काही भागात ११ जून रोजी मॉन्सून दाखल झाला. तर कोकण आणि मध्य महाराष्ट्रात ९ जूनपासून कोणतीही प्रगती झालेली नाही. तर देशाच्या पूर्व भागातही १२ जूननंतर मॉन्सूनने आणखी वाटचाल केलेली नाही. शुक्रवारपर्यंत (ता. २२) ‘एमजेओ’ची स्थिती पश्‍चिम विषुववृत्तीय हिंद महासागर व लगतच्या अरबी समुद्रामध्ये सक्रिय होण्याची, तसेच पूर्व भारतामध्ये चक्राकार वाऱ्यांची स्थिती निर्माण होऊन, पूर्वेकडील वाऱ्यांचे प्रवाह वाढण्याची शक्यता आहे. त्यामुळे रविवारपर्यंत (ता. २४) मॉन्सूनसाठी अनुकूल स्थिती निर्माण होणार आहे. २३ ते २५ जूनच्या दरम्यान आसाम, महाराष्ट्र, छत्तीसगड, ओडिशा, पश्‍चिम बंगाल, झारखंड, बिहार मध्य प्रदेशात मॉन्सूनची प्रगती शक्य असल्याचे हवामान विभागातर्फे सांगण्यात आले.