मराठवाड्यात पावसाची उसंत

औरंगाबाद : मराठवाड्यातील आठही जिल्ह्यांत सोमवारी (ता. २५) सकाळपर्यंतच्या चोवीस तासांत पावसाने उसंत घेतल्याचे चित्र आहे. औरंगाबाद, जालना, बीड, लातूर व उस्मानाबाद जिल्ह्यातील जवळपास ३५ मंडळातंच काय तो तुरळक पाऊस पडल्याची नोंद झाली आहे.

२५ जूनपर्यंतच्या पावसाच्या नोंदीनुसार मराठवाड्यातील ४२१ महसूल मंडळांपैकी ७ मंडळांत अपेक्षित पावसाच्या तुलनेत २५ टक्‍क्‍यांपेक्षाही कमी पाऊस पडला आहे. ३३ मंडळांत अपेक्षित पावसाच्या तुलनेत २५ ते ५० टक्‍के, ५० मंडळांत ५० ते ७५ टक्‍के, ७० मंडळांत ७५ ते १०० टक्‍के; तर २६१ मंडळांत अपेक्षित पावसाच्या तुलनेत जास्त पाऊस झाल्याची नोंद झाली आहे. औरंगाबाद जिल्ह्यातील २० मंडळांत अपेक्षित पावसाच्या पुढे जाऊन पाऊस झाला. 

जालना जिल्ह्यातील १४, परभणीतील ३०, हिंगोलीतील २३, नांदेडमधील ६०, बीडमधील ३६, लातूरमधील ५०; तर उस्मानाबाद जिल्ह्यातील २८ मंडळांत अपेक्षित पावसाच्या तुलनेत जास्त पाऊस पडल्याची नोंद आहे. सोमवारी सकाळपर्यंतच्या चोवीस तासांत औरंगाबाद जिल्ह्यातील १४ मंडळांत १ ते १४ मिलिमीटर, जालना जिल्ह्यातील केवळ परतूर तालुक्‍यातील तीन मंडळांत २ ते ७ मिलिमीटर, बीड जिल्ह्यातील केवळ एका मंडळात दोन मिलिमीटर, लातूर जिल्ह्यातील चार मंडळांत २ ते १० मिलिमीटर; तर उस्मानाबाद जिल्ह्यातील तेरा मंडळांत ३ ते १४ मिलिमीटरदरम्यान पावसाची नोंद झाली.