मध्य महाराष्ट्रात पावसाचा अंदाज

पुणे ः पावसाला पोषक हवामान असल्याने कोकण, मध्य महाराष्ट्रात मंगळवारपर्यंत (ता. २९) वादळी वाऱ्यासह पाऊस पडण्याचा अंदाज हवामान विभागाने वर्तविला आहे. मध्य महाराष्ट्रात उन्हाचा चटका कमी झाला असतानाच विदर्भात उष्णतेची लाट आली अाहे. वर्धा येथे उच्चांकी ४६ अंश सेल्सिअस तापमानाची नोंद झाली आहे. विदर्भात उष्णतेची लाट सोमवारपर्यंत (ता. २८) कायम राहण्याचा इशारा देण्यात आला आहे.  मध्य महाराष्ट्रात उन्हाचा चटका कमी झाला आहे. मालेगाव वगळता इतर ठिकाणी तापमान ३२ ते ३६ अंशांच्या आसपास आहे. मराठवाड्यात पारा ४१ ते ४५ अंश, तर विदर्भात बहुतांशी ठिकाणी ४४ ते ४६ अंशांदरम्यान तापमानाची नोंद होत आहे. विदर्भातील चंद्रपूर, ब्रह्मपुरी आणि वर्धा येथे तापमान ४५ अंशांपेक्षा अधिक असल्याने उष्णतेची लाट अाल्याचे स्पष्ट करण्यात आले आहे. विदर्भ आणि परिसरावर चक्राकार वारे वाहत असून, अरबी समुद्रावरून होणाऱ्या बाष्पाच्या पुरवठ्यामुळे कोकण, मध्य महाराष्ट्रात ढगाळ हवामान होत असून, वादळी वाऱ्यासह हलक्या पावसाचा अंदाज आहे.   शुक्रवारी (ता. २५) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३५.७, नगर ३६.५, कोल्हापूर ३३.८, महाबळेश्वर २४.६, मालेगाव ४१.२, नाशिक ३६.३, सांगली ३५.७, सातारा ३२.६, सोलापूर ३९.३, मुंबई ३४.७, अलिबाग ३५.२, रत्नागिरी ३४.६, डहाणू ३५.९, आैरंगाबाद ४१.०, परभणी ४४.८, नांदेड ४३.०, अकोला ४४.७, बुलडाणा ३९.५, ब्रह्मपुरी ४५.२, चंद्रपूर ४५.७, गोंदिया ४१.८, नागपूर ४४.७, वर्धा ४६.०, यवतमाळ ४४.५.