कोकण, मध्य महाराष्ट्रात तुरळक ठिकाणी पाऊस

पुणे ः कोकण, मध्य महाराष्ट्रात कमी दाबाचे क्षेत्र असल्याने काही ठिकाणी ढगाळ हवामान आहे. गुरुवारी रात्री कोकण व मध्य महाराष्ट्रात तुरळक ठिकाणी पावसाचा शिडकावा झाला आहे. उर्वरित भागात ऊन-सावल्याचा खेळ होता. त्यामुळे वातावरणात काही प्रमाणात उकाडा वाढून कमाल तापमानात वाढ झाली असल्याचे हवामान विभागाच्या सूत्रांनी सांगितले.  सध्या पावसाचा खंड पडला आहे. त्यामुळे शेतकरीवर्गातून चिंता व्यक्त केली जात आहे. कोकणाच्या काही भागात कमी दाबाचे क्षेत्र असल्याने गुरुवारी रात्री भिरा, फोंडा, सांगे येथे तीन मिलिमीटर पाऊस पडला. देवगड, दोडामार्ग, केपे, म्हसळा, राजापूर, रोह, उल्हासनगर, वाल्पोई येथे प्रत्येकी एक मिलिमीटर पाऊस पडला. तसेच दावडी, डुंगरवाडी येथे दोन मिलिमीटर, अंबोणे, शिरगाव, कोयना, ताम्हिणी या घाटमाथ्यावर एक मिलिमीटर पाऊस पडला.  राज्यात शुक्रवारी सकाळपर्यंतच्या चोवीस तासात विदर्भातील चंद्रपूर येथे चाळीस अंश सेल्सिअसची सर्वाधिक कमाल तापमानाची नोंद झाली आहे. त्यामुळे वातावरणात काहीसा उकाडा वाढला होता. परिणामी कमाल तापमानात सरासरीच्या तुलनेत दोन ते तीन अंश सेल्सिअसने वाढ झाली होती. कोकणातील कमाल तापमान ३५ अंश सेल्सिअसच्या दरम्यान होते.  मध्य महाराष्ट्र, मराठवाडा व  विदर्भातील कमाल तापमान ३५ ते ४० अंश सेल्सिअसच्या दरम्यान होते.   पुढील आठवड्यात माॅन्सून काही प्रमाणात सक्रिय होण्याची शक्यता असली तरी अजून काही दिवस पावसाची शेतकऱ्यांना वाट पाहावी लागणार आहे. येत्या मंगळवारपर्यंत कोकण, गोव्यात बहुतांशी ठिकाणी, मध्य महाराष्ट्रात व मराठवाड्यात काही ठिकाणी तर विदर्भात तुरळक ठिकाणी मेघगर्जनेसह पाऊस पडण्याची शक्यता आहे. पुणे परिसरातही आकाश अंशतः ढगाळ राहण्याची शक्यता आहे. अधूनमधून पावसाच्या हलक्या स्वरूपाच्या सरी बरसण्याची शक्यता आहे.   शुक्रवारी (ता. १५) सकाळी आठ वाजेपर्यंतच्या चोवीस तासातील कमाल तापमान (अंश सेल्सिअस) ः मुंबई ३३.८, सांताक्रूझ ३४.०, अलिबाग ३४.७, रत्नागिरी ३१.५,डहाणू ३४.८, पुणे ३३.१, जळगाव ३९.८, कोल्हापूर ३०.९, महाबळेश्वर २१.६, मालेगाव ३८.४, नाशिक ३३.६, सांगली ३२.०, सातारा ३०.२, सोलापूर ३४.५, औरंगाबाद ३६.३, परभणी शहर ३७.०, नांदेड ३७.०, अकोला ३९.२, अमरावती ३८.४, बुलढाणा ३८.०, ब्रम्हपुरी ३९.४, चंद्रपूर ४०.०, गोंदिया ३८.५, नागपूर ३९.१, वाशीम ३७.६, वर्धा ३९.२, यवतमाळ ३७.५.