पुणे, नाशिकसह घाटमाथ्यावर पावसाच्या हलक्या सरी

पुणे ः माॅन्सूनची तीव्रता कमी झाल्याने राज्यातील पावसाचा जोर काहीसा ओसरला आहे. गुरुवारी (ता. २८) मध्य महाराष्ट्रातील पुणे, नाशिक, सह्याद्रीच्या घाटमाथ्यावर हलक्या स्वरूपाच्या सरी बरसल्या. बुधवारी (ता. २७) सायंकाळी कोकण, मध्य महाराष्ट्र व विदर्भात तुरळक ठिकाणी जोरदार स्वरूपाचा पाऊस पडला आहे.  राज्यात २० ते २१ जूननंतर माॅन्सून पुन्हा सक्रिय झाला आहे. त्यामुळे मागील सात ते आठ दिवसांपासून राज्यातील बहुतांशी ठिकाणी पाऊस पडत आहे. मध्य महाराष्ट्रातील नगर, पुणे, सोलापूर, सातारा, सांगली, खान्देशातील नाशिक, जळगाव, धुळे, नंदुरबार जिल्ह्यातील काही भागात पावसाने उघडीप दिली आहे. तुरळक ठिकाणी जोरदार पावसाची प्रतीक्षा लागून आहे. मराठवाड्यातही पावसाचा जोर ओसरला आहे. विदर्भात तुरळक ठिकाणी पावसाच्या अधूनमधून हलक्या स्वरूपाच्या सरी पडल्या असून बहुतांशी ठिकाणी वातावरण ढगाळ आहे. आज कोकण, गोव्यात तुरळक ठिकाणी जोरदार पावसाची शक्यता आहे. मध्य महाराष्ट्र, मराठवाडा व विदर्भात पावसासाठी पोषक हवामान नसल्याने पावसाचा जोर कमी होण्याची शक्यता आहे. पुढील आठवड्यात पोषक हवामान झाल्यास पुन्हा पावसाचा जोर वाढण्याची शक्यता आहे. पुणे परिसरातही पावसाच्या अधूनमधून हलक्या सरी कोसळण्याचा अंदाज आहे.    बुधवारी सायंकाळी कोकणातील मंडणगड, संगमेश्वर देवरूख, भिरा, वैभववाडी, कणकवली, लांजा अशा अनेक ठिकाणी मध्यम स्वरूपाचा पाऊस पडला. मध्य महाराष्ट्रातील राधानगरी, गगनबावडा, इगतपुरी, चांदगड, लोणावळा, महाबळेश्वर, वेल्हे येथे हलका ते मध्यम स्वरूपाचा पाऊस पडला. मराठवाड्यातील माहूर, गंगाखेड, किनवट, उमरी येथे हलक्या स्वरूपाच्या पाऊस पडला. उर्वरित भागात ढगाळ तर काही ठिकाणी ऊन सावल्याचा खेळ सुरू होता. विदर्भातील मौदा, पेरसेवनी, देसाईगंज, कोरची, सडकअर्जुनी, गोंदिया, हिंगणघाट, जोती, कुरखेडा अशा विविध ठिकाणी मध्यम ते जोरदार स्वरूपाचा पाऊस पडला. उर्वरित भागात हलका पाऊस पडला असून काही भागात ढगाळ हवामान होते.   गुरुवारी (ता. २८) सकाळपर्यंत झालेला पाऊस ः मिलिमीटरमध्ये  कोकण ः मंडणगड, संगमेश्वर देवरूख ९०, भिरा, वैभववाडी ७०, कणकवली, लांजा, म्हसाळा, राजापूर ५०, सांगे ४०, दोडामार्ग, खेड, माथेरान,  पेण, फोंडा, रत्नागिरी, रोहा, सावंतवाडी, ठाणे ३०,  मध्य महाराष्ट्र ः राधानगरी ७०, गगनबावडा, इगतपुरी ६०, चांदगड ५०, लोणावळा, महाबळेश्वर ३०, पारोळा, वेल्हे २०, आजरा, भडगाव, भोर, भुसावळ, दहिगाव, एरंडोल, जावळेमेधा, ओझरखेड, पाटण १० मराठवाडा ः माहूर ६०, गंगाखेड ४०, किनवट ३०, उमरी २०, बिलोली, नायगाव, खैरगाव १०  विदर्भ  ः मौदा, पेरसेवनी ८०, देसाईगंज, कोरची, सडकअर्जुनी ७०, गोंदिया, हिंगणघाट, जोती, कुरखेडा ६०, आरमोरी, भद्रावती, भामरागड, देवरी, कामठी, कुही, लाखांदूर, नारखेड, साकोली ५०, अर्जुनीमोरगाव, धानोरा, गोंदिया, नागपूर, सावनेर, तिरोरा, ४०, अहिरी, आमगाव, आरणी, भंडारा, ब्रम्हपुरी, चंद्रपूर, चांदूर, चिमूर, दिग्रस, इटापल्ली, घाटंजी, मूलचेरा, नांदगाव काजी, रामटेक, सिरोंचा, तुमसर, वर्धा, वरोरा, वरूड, यवतमाळ ३०