दूध दर, एफआरपीप्रश्नी मोर्चा काढणार ः राजू शेट्टी

कोल्हापूर : उसाची थकीत एफआरपी व गाय दूध दरप्रश्‍नी सरकारने तोडगा काढून दूध उत्पादक आणि दूध संस्थांना चालना द्यावी, या प्रमुख मागण्यांसाठी 29 जूनला स्वाभिमानी शेतकरी संघटनेच्या वतीने पुण्यात साखर व दूध आयुक्तालयावर मोर्चा काढला जाणार आहे. अशी माहिती खासदार राजू शेट्टी यांनी दिली.  श्री. शेट्टी म्हणाले, की गायीच्या दुधाला प्रतिलिटर पाच रुपये थेट उत्पादकांच्या खात्यावर जमा केल्यास काही प्रमाणात उत्पादक आणि संस्थांना दिलासा मिळू शकतो. त्यामुळे सरकारने याकडे गांभीर्याने पाहण्याची गरज आहे. साखरेचे भाव पडले म्हणून ऊस उत्पादकांची बिले थकविणे योग्य नाही. उसाचा वाढता उत्पादन खर्च लक्षात घेता शेतीमालाला उत्पादन खर्चाच्या दीडपट हमीभाव मिळावा, यासाठी आपला लढा सुरू आहे. यासाठी देशातील शेतकरी संघटनांना एकत्र आणून सरकारवर दबाव आणला जातोय. लवकरच याप्रश्‍नी ठोस दिशा निश्‍चित केली जाणार आहे, असे त्यांनी सांगितले.  गायीच्या दुधाचे वाढते प्रमाण तसेच दूध पावडर तयार करण्यासाठी खरेदीच्या दरापेक्षा जादा पैसे मोजावे लागत आहेत. यातून लिटरमागे दूध संस्थांना नऊ ते दहा रुपयांचे नुकसान सोसावे लागते. आज अनेक संस्थांना गायीचे दूध खरेदी करण्यावर मर्यादा येत आहेत. थेट उत्पादकांना प्रतिलिटर पाच रुपये दिल्यास काहीसा दिलासा मिळू शकतो. त्यामुळे थकीत ऊस दर आणि गायीच्या दूध दरप्रश्‍नी साखर आणि दूध आयुक्तालयावर मोर्चा काढला जाणार असल्याचे खासदार शेट्टी यांनी सांगितले.