सोलापुरात शुक्रवारी जमीन सुपीकतेवर चर्चासत्र

सोलापूर: शेतीतील नवीन तंत्रज्ञान, माहिती थेट शेतकऱ्यांपर्यंत पोचवणाच्या उपक्रमाचा एक भाग म्हणून ‘सकाळ-ॲग्रोवन’ च्या वतीने शुक्रवारी (ता. २९) सोलापुरात ‘जमीन सुपीकता’ या विषयावर चर्चासत्राचे आयोजन करण्यात आले आहे. जिल्हा परिषदेजवळील रंगभवन सभागृहात सकाळी दहा ते दोन या वेळेत हे चर्चासत्र होईल. यूपीएल कंपनीने हा कार्यक्रम प्रायोजित केला असून, ट्रेडकॉर्प हे सहप्रायोजक आहेत. जिल्ह्यातील ऊस, डाळिंब, द्राक्ष उत्पादकांसाठी हे चर्चासत्र एक पर्वणी ठरणार आहे. विशेषतः क्षारपड जमिनीमुळे जिल्ह्यातील पंढरपूर, माळशिरस, करमाळा, माढा भागांतील ऊस उत्पादकांसमोर मोठी समस्या निर्माण झाली आहे. त्यांच्यासाठी हे चर्चासत्र उपयुक्त ठरणार आहे. जमीन सुपीकता, कोरडवाहू शेती पद्धती, जल-मृद संधारणातील या विषयातील तज्ज्ञ आणि महात्मा फुले कृषी विद्यापीठाच्या मृदशास्त्र विभागाचे माजी विभाग प्रमुख डॉ. अजितकुमार देशपांडे आणि जमीन सुपीकता या विषयावर सखोल अभ्यास असणारे कोल्हापूर येथील प्रयोगशील शेतकरी प्रताप चिपळूणकर हे या चर्चासत्रात शेतकऱ्यांना मार्गदर्शन करतील. राज्यातील जमिनीचे आरोग्य दिवसेंदिवस बिघडत चालल्याने ‘ॲग्रोवन’ने हे वर्ष जमीन सुपीकता वर्ष म्हणून जाहीर केले आहे. त्या अंतर्गत पहिले चर्चासत्र पुण्यात झाले. दुसरे चर्चासत्र जळगावात आणि तिसरे नाशिकमध्ये झाले. या सर्व चर्चासत्रांना शेतकऱ्यांचा भरघोस प्रतिसाद मिळाला. शिवाय अशा चर्चासत्रांची मागणी राज्यभरातील शेतकऱ्यांकडून होत असल्याने आता चौथे चर्चासत्र सोलापुरात होत आहे. यानंतर टप्प्याटप्याने राज्यातील वेगवेगळ्या जिल्ह्यात अशी चर्चासत्रे घेण्यात येणार आहेत.  सोलापूर हा कोरडवाहू जिल्हा म्हणून ओळखला जातो. पण, जिल्ह्यातील निम्मा भाग हा उजनी धरणामुळे बागायती झाला आहे. या पट्ट्यात ऊस, डाळिंब, द्राक्ष या पिकांत जिल्हा अग्रेसर आहे. विशेषतः डाळिंब आणि उसामध्ये जिल्ह्याची आघाडी आहे. पण नदीकाठच्या पंढरपूर, माळशिरस, माढा, करमाळा या भागांत ऊस, डाळिंब उत्पादकांना क्षारपड जमिनीच्या समस्येला सामोरे जावे लागत आहे. त्याशिवाय कोरडवाहू क्षेत्रातीलही विविध पिकांच्या उत्पादनवाढीसाठी जमिनीचा कस सुधारणे आवश्‍यक आहे.  चर्चासत्राचे नियोजन असे...