शेतकऱ्यांच्या जीवनात ‘ॲग्रोवन’चे अनन्यसाधारण महत्त्व : शिवेंद्रसिंहराजे भोसले

सातारा : जीवनमान उंचावण्यास मोठी मदत झाल्याने शेतकऱ्यांच्या जीवनात ‘ॲग्रोवन’चे अनन्यसाधारण महत्त्व आहे. सातारा जिल्हा बॅंक ही शेतकऱ्यांची अर्थवाहिनी असून, पुढील काळात जिल्हा बॅंक व ‘ॲग्रोवन’ यांच्या संयुक्त विद्यमाने वेगवेगळ्या विषयांवरील चर्चासत्रांचे अायोजन करणार असल्याचे प्रतिपादन सातारा जिल्हा मध्यवर्ती बॅंकेचे अध्यक्ष आमदार शिवेंद्रसिंहराजे भोसले यांनी येथे केले. जिल्हा बॅंकेतर्फे शेतकरी मंडळे व बॅंकेच्या शाखांत दैनिक ॲग्रोवनचे अंक सुरू करण्यात आले आहेत, याकरिताचा धनादेश उपाध्यक्ष आमदार भोसले यांनी ॲग्रोवनचे संपादक आदिनाथ चव्हाण यांच्याकडे शुक्रवारी (ता. १५) सुपूर्द केला, त्या वेळी ते बोलत होते. या प्रसंगी संचालक आमदार बाळासाहेब पाटील, दादाराजे खर्डेकर, विक्रमसिंह पाटणकर, प्रभाकर घार्गे, नितीन पाटील, प्रकाश बडेकर, दत्तानाना धमाळ, प्रदीप विधाते, कांचन साळुंखे, ॲग्रोवन वितरण व्यवस्थापक चंद्रशेखर जोशी, जिल्हा बॅंकेचे मुख्य कार्यकारी अधिकारी डॉ. राजेंद्र सरकाळे, सरव्यवस्थापक संजय जाधव, मधुकर जाधव, व्यवस्थापक सुजित शेख आदी उपस्थित होते. आमदार भोसले म्हणाले, ‘‘जिल्हा मध्यवर्ती बॅंक ही जिल्ह्यातील शेतकऱ्यांना आधारस्तंभ आहे. सातत्याने शेतकऱ्यांच्या हितासाठी बॅंक कार्यरत आहे. शेतकऱ्यांना जास्तीतजास्त शेतीविषयक माहिती उपलब्ध व्हावी, यादृष्टीने हा उपक्रम हाती घेतला आहे.’’  माजी आमदार पाटणकर म्हणाले, ‘‘दैनिक ॲग्रोवनमुळे शेतकऱ्यांच्या उत्पादन वाढ झाली आहे. यापुढे शेतमालाची विक्री, प्रक्रिया उद्योग, तसेच वनस्पती लागवड व विक्री व्यवस्था याविषयी शेतकऱ्यांना मार्गदर्शन करावे.’’ श्री. चव्हाण म्हणाले, ‘‘सातारा जिल्हा मध्यवर्ती बॅंक ही राज्यातील शेतकऱ्यांसाठी सहकारात काम करणारी सर्वोत्कृष्ट बॅंक आहे. शेतकऱ्यांसाठी या बॅंकेच्या माध्यमातून भविष्यात शेती उत्पादनात वाढ, विक्री व्यवस्था, औषधी वनस्पती याविषयी चर्चासत्राचे संयुक्तरीत्या अयोजन करू.’’ बॅंकेने नाबार्डच्या मार्गदर्शनाखाली उत्कृष्ट ३०० शेतकरी मंडळांना व जिल्ह्यातील सर्व शाखांना दैनिक ॲग्रोवनचे अंक सुरू केले आहेत. मुख्य कार्यकारी अधिकारी डॉ. सरकाळे यांनी आभार मानले.