बफर स्टॉकच्या शक्‍यतेने साखर १०० रुपयांनी वधारली

कोल्हापूर : गेल्या अनेक दिवसांपासून मंदीच्या सावटात असणाऱ्या साखरदराच्या किमतीत सोमवारी (ता. २१) क्विंटलमागे सुमारे १०० रुपयांची वाढ झाली. सरकार बफर स्टॉक तयार करण्याच्या मानसिकतेत असल्याची चर्चा सुरू झाल्याने ही वाढ झाल्याचे साखर उद्योगातील सूत्रांनी सांगितले. सोमवारी (ता. २१) विविध बाजारपेठांत साखरेस २६०० ते २७५० रुपये इतका दर होता.  गेल्या अनेक महिन्यांपासून साखरेचे दर पडून असल्याने कारखानदार अडचणीत आहेत. यातच कमी दराने साखर विक्री होत नसल्याने कारखान्यांनी विक्रीबाबत वेट ॲँड वॉचचे धोरण स्वीकारले आहे. अडीच हजार रुपयांच्या खाली साखर विक्री करणे परवडत नसल्याने कारखान्यांनी विक्रीबाबत लवचिक धोरण स्वीकारले आहे. गेल्या दोन दिवसांपासून शासकीय पातळीवरून केंद्र तीस लाख टनांचा बफर स्टॉक करेल. साखरेच्या किमान विक्रीच्या दराबबाबत काही तरी निर्णय घेईल, अशा चर्चा सध्या बाजारपेठांमध्ये सुरू झाल्या आहेत. बफर स्टॉकची घोषणा होण्याअगोदर मिळेल त्या दरात साखर खरेदीसाठी काही व्यापारी सरसावले. तातडीने साखर आणण्यासाठी व्यापाऱ्यांनी दरातही शंभर रुपयांच्या आसपास वाढ केल्याने गेल्या काही दिवसांच्या तुलनेत दिल्लीसह अन्य काही बाजारपेठांत सोमवारी थोडे समाधानकारक वातावरण पाहायला मिळाले. सूत्रांनी दिलेल्या माहितीनुसार महाराष्ट्रातील वीस ते एकवीस कारखान्यांनी सुमारे नऊशे क्विंटल साखरेची विक्री केली केली. हा माहोल आणखी काही दिवस राहिल्यास अनेक कारखाने थोड्या थोड्या प्रमाणात तरी साखर विक्रीस काढतील अशी शक्‍यता आहे.  बैठका शक्‍य सध्या अतिरिक्त साखरेमुळे राज्यातील कारखानदार अडचणीत आले आहेत. साखर आयुक्तालयांच्या वतीने यातून मार्ग काढण्यासाठी सुभाष देशमुख यांच्या उपस्थितीत बैठक होण्याची शक्‍यत आहे. मुख्यमंत्री देवेंद्र फडणवीस हेही साखर उद्योगाबाबत काही दिवसांत पंतप्रधानांना भेटतील, अशी माहिती साखर आयुक्तालयाच्या सूत्रांनी दिली.