‘स्वाभिमानी’चे सेंट्रल बँकेसमोर अांदोलन

बुलडाणा ः दाताळा (ता. मलकापूर) येथील सेंट्रल बँकेच्या शाखेत व्यवस्थापकाने पीककर्जाच्या बदल्यात शेतकऱ्याच्या पत्नीला शरीरसुखाची मागणी केल्याच्या घटनेने राज्यात खळबळ उडाली असतानाच, शनिवारी (ता. २३) स्वाभिमानीच्या कार्यकर्त्यांनी बँकेचे फलक फाडून काळे फासले. स्वाभिमानी'च्या कार्याकर्त्यांनी या बँक परिसरात घोषणाबाजी करीत कारवाईची मागणी केली.  स्वाभिमानी शेतकरी संघटनेचे देवेंद्र भुयार, राणा चंदन, प्रदीप शेळके यांच्यासह कार्यकर्त्यांना मलकापूर पोलिसांनी या अांदोलन प्रकरणी ताब्यात घेतले. पीककर्ज मंजूर करून देण्यासाठी शेतकऱ्याच्या पत्नीला शरीरसुखाची मागणी करण्याचा प्रकार सेंट्रल बँकेच्या दाताळा शाखेत समोर अाला होता.   या प्रकरणी दाताळा गावातील शेतकरी त्याच्या पत्नीसोबत पीककर्जासाठी गुरुवारी (ता.२१) सेंट्रल बँकेच्या शाखेत गेला होता. कागदपत्रांची पाहणी करून तुमचा मोबाईल नंबर द्या, अशी सूचना बँक व्यवस्थापकाने केली. संबंधित शेतकऱ्याने त्याच्या पत्नीचा मोबाईल नंबर दिला. त्यावर शाखाधिकाऱ्याने अश्लिल संभाषण करून शरीरसुखाची मागणी केल्याचा अारोप अाहे. शाखाधिकाऱ्याने शरीरसुखाची मागणी केली. मोबदल्यात पीककर्जासोबत वेगळा पॅकेज देईन, असा निरोप शिपायामार्फत महिलेला पाठविला होता. संबंधित महिलेने बँक व्यवस्थापकाशी झालेल्या संवादाचे रेकॉर्डिंग करून मलकापूर ग्रामीण पोलिसात तक्रार दिली अाहे. त्या अनुषंगाने पोलिस निरीक्षक बी. आर. गावंडे यांनी शाखाधिकारी राजेश हिवसे व शिपाई मनोज चव्हाण या दोघांविरोधात गुन्हा दाखल केला. या घटनेमुळे राज्यभर खळबळ उडाली अाहे. शनिवारी स्वाभिमानी शेतकरी संघटनेच्या कार्यकर्त्यांनी दाताळा येथे बँकेवर धाव घेतली. राजेश हिवसेला बडतर्फ करून अटक करण्याची मागणी केली. ही कारवाई न केल्यास बँकेचा कारभार चालू देणार नसल्याचा इशारा दिला.