तुरळक ठिकाणी जोरदार पावसाची शक्यता

पुणे : राज्यातील काही ठिकाणी हवेचा दाब कमी होत आहे. आज, शनिवारी (ता. १९) विदर्भात काही ठिकाणी मुसळधार, तर तुरळक ठिकाणी जोरदार पाऊस पडण्याची शक्यता आहे. कोकण, मध्य महाराष्ट्र व मराठवाड्यात तुरळक ठिकाणी जोरदार पाऊस पडेल. उद्या (ता. २०) कोकण, गोवा व मध्य महाराष्ट्रात काही ठिकाणी अतिवृष्टी होण्याची शक्यता आहे. मराठवाड्यात काही ठिकाणी मुसळधार तर तुरळक ठिकाणी जोरदार पाऊस पडेल. विदर्भात तुरळक ठिकाणी मुसळधार पाऊस पडण्याचा अंदाज हवामान विभागाच्या सूत्रांनी वर्तविला आहे.   अरबी समुद्र व कोकणाच्या काही भागात कमी दाबाचा पट्टा तयार झाला आहे. त्यामुळे कोकण रायगड, रत्नागिरी, सिंधुदुर्ग, पालघर जिल्ह्याच्या काही भागात हलका ते मध्यम स्वरूपाचा पाऊस शुक्रवारी (ता. १८) पडला. मध्य महाराष्ट्रातील मावळ, मुळशी, भोर, वेल्हा, पुणे, महाबळेश्वर, इगतपुरी आणि खान्देशातील जळगावच्या काही भागात पावसाच्या हलक्या सरी बरसल्या. उर्वरित मध्य महाराष्ट्रातील नगर, सो्लापूर सातारा, सांगली, कोल्हापूर, नाशिकच्या अनेक भागात ढगाळ हवामान होते. तर काही ठिकाणी चांगलेच कडक ऊन पडले. मराठवाड्यातही ढगाळ वातावरण तर अधूनमधून ऊन पडत होते. त्यामुळे हवामानात दमटपणा वाढून कमाल तापमानात वाढ झाली होती. विदर्भातील अनेक भागात ढगाळ हवामान होते. काही ठिकाणी कडक ऊन पडल्याचे चित्र होते. येत्या सोमवारी (ता. २१) कोकण, गोव्यात तुरळक ठिकाणी मुसळधार पाऊस पडण्याची शक्यता आहे. शुक्रवारी (ता. १८) सकाळी आठ वाजेपर्यंत कोकणातील खेडमध्ये ४० मिलिमीटर पावसाची नोंद झाली. कणकवलीमध्ये ३० मिलिमीटर तर उर्वरित काही भागात हलका पाऊस पडला. मध्य महाराष्ट्रातील आजरा, गगनबावडा, राधानगरी येथे दहा मिलिमीटर पाऊस पडला. उर्वरित भागात ढगाळ हवामान होते. मराठवाड्यातील धारूर, लातूर, रेणापूर येथेही पावसाच्या हलक्या सरी कोसळल्या. विदर्भातील आणगाव, इटापल्ली, गोरेगाव, नांदुरा, सालेकसा येथेही हलका पाऊस पडला. उर्वरित काही ठिकाणी पावसाच्या अधूनमधून सरी बरसत होत्या. काही भागात ढगाळ हवामान असल्याचे हवामान विभागाच्या सूत्रांनी सांगितले.  शुक्रवारी (ता. १८) सकाळी आठ वाजेपर्यंत झालेला पाऊस ः मिलिमीटरमध्ये   : कोकण ः खेड ४०, कणकवली ३०, दौडामार्ग, हर्णे, मंडणगड २०. मध्य महाराष्ट्र ः आजरा, गगनबावडा, राधानगरी १०. मराठवाडा ः धारूर, लातूर, रेणापूर १०. विदर्भ ः आमगाव, ईटापल्ली, गोरेगाव, नांदुरा, सालेकसा २०, बाभूळगाव, भामरागड, चार्मोशी, देवरी, गोंदिया, पनवी, साकोली, शिंदेवाही, तिरोरा, तुमसर १०. घाटमाथा ः अंबोणे ४०, कोयना (पोफळी) २०, लोणावळा (आँफीस), शिरगाव, वाणगाव, दावडी, कोयना, ताम्हिणी १०.