सोलापूर जिल्ह्यात टंचाई निवारणासाठी सूक्ष्म आराखडे तयार करा

सोलापूर : जिल्ह्यात निर्माण झालेल्या टंचाईवर मात करण्यासाठी टंचाई निवारणासाठी करण्यात येणाऱ्या सर्व उपाय-योजनांचा सूक्ष्म आराखडा तयार करावा, अशा सूचना पालकमंत्री विजय देशमुख यांनी अक्कलकोट येथे दिल्या.

देशमुख यांनी सोमवारी (ता.१५) अक्कलकोट तालुक्‍यातील इंगळगी, जेऊर, नागणसूर, बोरोटी, उटगी गावातील शेतकऱ्यांच्या पिकांची पाहणी केली. त्यानंतर पंचायत समितीतील आढावा बैठकीत ते बोलत होते. आमदार सिद्धराम म्हेत्रे, नगराध्यक्षा शोभा खेडगी, पंचायत समिती सभापती सुरेखा काटगाव, उपविभागीय अधिकारी ज्योती पाटील, तहसीलदार अंजली मरोड, गटविकास अधिकारी महादेव कोळी यांच्यासह संबंधित विभागाचे अधिकारी या वेळी उपस्थित होते.

देशमुख म्हणाले, ‘‘यंदा पावसाचे प्रमाण कमी झाल्याने टंचाईसदृश परिस्थिती निर्माण झाली आहे. मात्र शेतकऱ्यांनी खचून जाऊ नये. सर्व उपयायोजना करून शासन शेतकऱ्यांच्या पाठीशी ऊभे राहील. टंचाई लक्षात घेऊन पाणी पुरवठ्याचे स्त्रोत आरक्षित करावे, त्यांच्या बळकटीकरणावर भर द्यावा. पिण्याचे पाणी, जनावरांना चारा या गोष्टींना प्राधान्य द्यावे. संबंधित अधिकाऱ्यांनी विशेषत: महसूल व कृषी विभागाने टंचाई परिस्थितीचा अहवाल तयार करून तो तातडीने शासनास पाठवावा, जेणेकरून जिल्ह्यात टंचाई परिस्थिती जाहीर होण्यास मदत होईल.``

पालकमंत्र्यांनी इंगळगी गावास भेट दिली. या वेळी गावास पिण्याच्या पाण्याचा टॅंकर मिळावा, अशी मागणी ग्रामस्थांनी केली. जेऊर येथील शेतकरी शरणप्पा गुरव यांच्या पिकाचीही त्यांनी पाहणी केली.

 जेऊर ग्रामस्थांशी संवाद साधताना पालकमंत्री म्हणाले, ‘‘या भागात पाण्याची समस्या गंभीर आहे. लोकांना पिण्याचे पाणी उपलब्ध केले जाईल. जेऊर गावचा पाणीपुरवठा योजनेसाठी प्रस्ताव द्यावा, त्यासाठी आवश्‍यक ती मदत केली जाईल.`` दरम्यान शेतकऱ्यांच्या पीकविम्याची रक्कम तातडीने देण्याबाबत संबंधित विभागाला त्यांनी सूचना दिल्या.

नागणसूर येथे शेतकऱ्यांशी संवाद साधताना पालकमंत्री म्हणाले, ‘‘कमी पावसामुळे शेतकऱ्यांचा खरीप गेला व रब्बीची शक्‍यता कमी आहे. त्यामुळे पिण्याचे पाणी आणि जनावरांचा चाऱ्यास प्राधान्य देण्यात येईल. या भागात रोजगार हमीची कामे सुरू होतील. बोराटी येथील तलावातील गाळ नेण्यासाठी शेतकरी पुढे आल्यास तेथील गाळ काढण्यात येईल.