ऊस गाळपात राज्याची आघाडी

पुणे : राज्यातील १८२ साखर कारखान्यांनी ऊस गाळपात जोरदार आघाडी घेतली आहे. आतापर्यंत ४५३ लाख टन उसाचे गाळप झाले आहे. गेल्या हंगामात एकूण गाळप ४२० लाख टनाचे होते.

‘‘गेल्या हंगामाच्या तुलनेत राज्यातील साखर कारखान्यांकडून अतिशय समाधानकारक काम होत आहे. कारखान्यांनी गाळप वाढवल्यामुळे शेतकऱ्यांकडे एफआरपीच्या माध्यमातून दोन हजार कोटी रुपयांपेक्षा जादा पेमेंट जाण्याची शक्यता आहे,’’ अशी माहिती साखर उद्योग सूत्रांनी दिली.

राज्यात यंदा किमान १९० साखर कारखाने गाळपाला उतरतील, असा राज्य शासनाचा अंदाज होता. प्रत्यक्षात आतापर्यंत १८२ कारखाने चालू झाले आहेत. त्यात ९८ सहकारी आणि ८४ खासगी कारखान्यांचा समावेश आहे.

काही भागात ऊसदरासाठी उग्र आंदोलने होऊनदेखील गेल्या वर्षीच्या तुलनेत कारखान्यांनी गाळपाचा वेग जोरदार ठेवला. त्यामुळेच  आतापर्यंत ४५३ लाख टन गाळप करून ४७.२० लाख टन साखर तयार केली आहे. राज्याचा साखर उतारा सध्या सरासरी १०.४३ टक्के येतो आहे. गेल्या हंगामात याच कालावधीत  १४९ कारखान्यांनी अवघा २८१ लाख टन ऊस गाळून ३०.१० लाख टन साखर तयार केली होती.

राज्यात सर्वांत जास्त म्हणजे ६१ साखर कारखाने पुणे विभागात सुरू आहेत. या विभागाने १७७ लाख टन ऊस गाळून १८.५० लाख टन साखर तयार केली आहे. पुणे व कोल्हापूर विभागात यंदा भरपूर ऊस उपलब्ध असल्यामुळे गाळपाचा वेग पुढील दोन महिने टिकून राहील. त्यामुळे राज्याच्या एकूण साखर उत्पादनात यंदा भरीव वाढ दिसेल, असे सूत्रांनी स्पष्ट केले.