तानसा परिसरातील गावांना धोका नाही: धरणाचे १६ दरवाजे उघडे

ठाणे : तानसा परिसरात सोमवारी रात्रीपासून मंगळवार दुपारपर्यंत १९५ मिमी पाऊस झाला. यावेळी धरणाचे ३८ दरवाजे स्वयंचलित पद्धतीने उघडण्यात आले होते. मात्र, आता सध्या १६ दरवाजे उघडे असून उर्वरित बंद आहेत, असे सहायक अभियंता यांनी सांगितले आहे. दरवर्षी अशा रीतीने सर्व दरवाजे उघडे करावे लागतात, अशी माहितीही त्यांनी दिली.

तानसा परिसरातील गावांना सोमवारपासूनच खबरदारीचा इशारा देण्यात आला होता. ठाणे आणि पालघर जिल्हाधिकारी कार्यालयांना तशा सुचना देण्यात आल्या होत्या. मात्र आता मुंबईच्या तुलनेत पावसाचा जोर बराच कमी असल्याने काही दरवाजेही बंद करण्यात आले असून कोणत्याही गावाला धोका नाही, अशी माहिती जिल्हा प्रशासनाने दिली.