शेतकऱ्यांनी गटशेतीचा पर्याय अवलंबावा : कृषिमंत्री डॉ.बोंडे

अमरावती :‘‘गटशेती ही काळाची गरज असून; शेतकऱ्यांनी या पर्यायाचा अवलंब करावा. शासन सवलती आणि अनुदान योजनांचा लाभ घेऊन प्रगती साधावी,’’ असे प्रतिपादन कृषिमंत्री डॉ. अनिल बोंडे यांनी गव्हाणकुंड येथे केले. 

वरुड-टेंभूरखेडा, गव्हाणकुंड-बहादा, जरुड-मांगरुळी, काचुर्णा-नांदगाव या १४५ कोटी ३२ लाख रुपयांच्या रस्ता बांधकामासह एकूण १४७ कोटी रुपयांच्या विकासकामांचे भूमिपूजन डॉ. बोंडे यांच्या हस्ते करण्यात आले. 

डॉ. बोंडे म्हणाले, ‘‘शेतकऱ्यांनी उद्योगप्रवण होणे गरजेचे आहे. शेतीमध्ये व्यावसायिकता आणली, तरच ती फायद्याची होईल. त्याकरिता संरक्षित सिंचनाचे पर्याय उपलब्ध करून घ्यावे. अशा शेतीत नंतर व्यावसायिक पिकांची लागवड करावी. त्यापूर्वी बाजारपेठेचा अभ्यास केल्यास विपणनदेखील सोपे होते. गावात एकाच शेतकऱ्याने व्यावसायिक पीक घेतल्यास विपणनाची अडचण निर्माण होते. दूरच्या बाजारपेठेत शेतीमाल पाठविण्याची वेळ आल्यास वाहतुकीवर मोठा खर्च होतो. हे टाळण्यासाठी गटशेतीवर भर द्यावा.’’ 

‘‘गावात एकाच पिकाखाली क्षेत्र वाढल्यास आणि दर्जेदार शेतमालाचे उत्पादन घेतल्यास व्यापारी सुद्धा अशा गावांमध्ये थेट खरेदीसाठी पोचतात. त्यामुळे गटशेतीतून अनेक फायदे होत असल्याने या पर्यायाचा अवलंब अधिकाधिक व्हावा. शेतीमालावर प्रक्रियेचे प्रकल्प स्थानिक स्तरावर उभारल्यास त्यातूनही चार पैसे मिळण्यास आणि गावातील युवकांना रोजगार उपलब्धतेचा पर्याय उपलब्ध होईल. गव्हाणकुंड भागात सौरऊर्जा प्रकल्पाची उभारणी प्रस्तावित आहे. लवकरच या कामाला सुरवात होईल. शेकदरी धरणावरून पाइपलाइनने शेतापर्यंत पाणी जाईल,’’ असेही डॉ. बोंडे यांनी सांगितले.

‘‘जिल्ह्याला २०० पॅकहाउस लक्ष्यांक आहे. त्याचा लाभ अनेकांना मिळेल. शेतकरी बांधवांसह शेतमजुरांसाठी विमा, शिक्षण, आरोग्य योजना कृषी विभागाकडून राबविण्याचे नियोजन आहे, असेही त्यांनी सांगितले. सरपंच सुमित्रा मुरुमकर यांच्यासह प्रगती महिला संघाच्या सदस्या या वेळी उपस्थित होत्या.