एलईडीच्या मदतीने केल्या जाणाऱ्या मासेमारीवर बंदी : मंत्री अस्लम शेख

संग्रहित छायाचित्र
संग्रहित छायाचित्र

मुंबई  : समुद्रात एलईडीच्या मदतीने केल्या जाणाऱ्या मासेमारीवर पूर्णपणे बंदी घालण्याची घोषणा मस्त्यव्यवसाय मंत्री अस्लम शेख यांनी केली. यापुढे एलईडीने मासेमारी करताना आढळून आल्यास अशा बोटींना जबर दंड आकारण्यात येईल, असेही त्यांनी जाहीर केले.

मच्छिमारांच्या प्रलंबित प्रश्नांवर चर्चा करण्यासाठी मंत्री अस्लम शेख यांनी मंत्रालयात शुक्रवारी (ता. १४) बैठक घेतली. बैठकीला मत्यव्यवसाय विभागाच्या अधिकाऱ्यांसह अखिल महाराष्ट्र मच्छीमार कृती समितीचे पदाधिकारी उपस्थित होते. या बैठकीत त्यांनी अनेक महत्त्वाचे निर्णय जाहीर केले.

मंत्री शेख म्हणाले, की एका परवान्यावर अनेक बोटी मासेमारी करतात. हे रोखण्यासाठी यापुढे बोटींना जीपीएस (ग्राऊंड पोझिशन सिस्टीम) बसविण्यात येईल. त्यामुळे अवैध मासेमारीला आळा बसेल. तसेच अवैध मासेमारी रोखण्यासाठी राज्य सरकार कायदा करणार असल्याचे त्यांनी सांगितले.

एलईडीच्या मदतीने मासेमारी करताना जप्त केलेली बोट ज्या मच्छीमार संस्थेची असेल त्या संस्थेच्या सर्व शासकीय सवलती रद्द करण्यात येतील. पारंपरिक मासेमारीला चालना देण्याचे राज्य सरकारचे धोरण आहे. अवैध पर्ससीन मासेमारी, एलईडीच्या सहाय्याने होणारी मासेमारी रोखण्यासाठी सागरी पोलीस, तटरक्षक दल, मत्स्य विभाग यांनी संयुक्तपणे कारवाई करण्याचे निर्देश याआधीच देण्यात आले आहेत. बेकायदा मासेमारीला आळा घालण्यासाठी मालकांनी बोटींवर सीसीटीव्ही यंत्रणा बसवावी, असे आवाहन त्यांनी केले.

अवैध मासेमारीच्या विरोधात कारवाई करण्याचे अधिकार पोलीस आणि महसूल प्रशासनाला असून हे अधिकार मत्स्य विभागाकडे घेण्यात येतील. पर्ससीन जाळीमुळे पारंपरिक मासेमारीवर होणाऱ्या परिणामांचा अभ्यास करण्यासाठी डॉ. सोमवंशी यांची समिती नेमण्यात आली होती. या समितीच्या शिफारशींवर निर्णय घेण्यासाठी लवकरच समिती नेमली जाईल, अशी माहिती मत्स्यव्यवसाय मंत्र्यांनी दिली.   ‘अपघात विम्यापोटी दिली जाणारी मदत वाढविणार’ मासेमारी करताना मच्छीमाराचा मृत्यू झाल्यास त्याच्या वारसाला अपघात विम्यापोटी एक लाख रुपयांची मदत दिली जाते. या मदतीत चार लाख रुपयांची वाढ करून ती पाच लाख रूपये करण्यासाठी प्रयत्न करणार असल्याचे मंत्री शेख यांनी या वेळी सांगितले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com