खेड तालुक्यात ४८ कोटींचे पीक कर्ज वाटप

पुणे  ः पुणे जिल्हा मध्यवर्ती सहकारी बॅंकेने येत्या खरीप हंगामासाठी शेतकऱ्यांना पीक कर्जवाटप सुरू केले आहे. खेड तालुक्यातील ७४४२ शेतकऱ्यांना ४८ कोटी ५६ लाख ७० हजार रुपयांचे पीक कर्जवाटप करण्यात आल्याची माहिती बँकेचे विभागीय अधिकारी विलास भास्कर यांनी दिली.

खेड तालुक्यात पुणे जिल्हा बॅंकेच्या १८ शाखा कार्यरत आहेत. तालुक्यात शंभरपेक्षा जास्त सहकारी सोसायट्या आहेत. त्यांच्या माध्यमातून दरवर्षी शेतकऱ्यांना खरीप व रब्बी हंगामासाठी पीक कर्ज वाटप केले जाते. यावर्षी अनेक शेतकऱ्यांना शासनाच्या कर्जमाफीचा फायदा झाला आहे. त्यानंतर शासनाने दुसरे धोरण जाहीर करीत नियमित कर्ज भरणाऱ्या शेतकऱ्यांना ५० हजार रुपये प्रोत्साहन अनुदान जाहीर केले. त्यामुळे शेतकऱ्यांनी ३१ मार्चपूर्वी नियमित कर्ज भरली आहेत.

यंदा मार्चअखेर तब्बल ९७.५ टक्के कर्ज वसुली झाली आहे. ‘कोरोना’चे संकट आल्याने शेतकरी वर्ग अडचणीत सापडला आहे म्हणून जिल्हा बॅंकेने शेतकऱ्यांना या महिन्याच्या सुरुवातीपासून पीक कर्जवाटप करण्यास सुरुवात केली आहे. आत्तापर्यंत खेड तालुक्यातील जिल्हा बॅंकेच्या १८ पैकी दहा शाखांमधून ७४४२ शेतकऱ्यांना ६३२३ हेक्टरसाठी ४८ कोटी ५६ लाख ७० हजार रुपयांचे पीक कर्ज वाटप केले आहे. उर्वरित आठ शाखांच्या माध्यमातून पीक कर्ज वाटपास सुरुवात झाली आहे.