चाकणच्या जनावरे बाजारात एक कोटींची उलाढाल

पुणे  ः गेल्या सव्वा दोन महिन्यांपासून ‘कोरोना’च्या पार्श्वभूमीवर बंद असलेला चाकण (ता.खेड) येथील जनावरांचा बाजार शनिवारपासून (ता.३०) सुरू झाला. या बाजारात जर्सी गायी, बैल, म्हशी व शेळ्या मेढ्यांची मोठी आवक झाली. शनिवारी दिवसभरात सुमारे ४५४ जनावरांची विक्री झाली. यातून सुमारे एक कोटी रुपयांची उलाढाल झाली असल्याचे बाजार समितीच्या सूत्रांनी सांगितले.

चाकण येथील महात्मा फुले मार्केटच्या आवारात महिन्यातील प्रत्येक शनिवारी जनावरांचा मोठा बाजार भरतो. लॉकडाउनमुळे हा बाजार बंद होता. बाजार समितीचे सभापती विनायक घुमटकर यांनी पणन विभागाकडे बाजार सुरु करण्याबाबत मागणी केली होती. या मागणीनुसार हा बाजार सुरू करण्यात आला. शनिवारी बाजार सुरू झाल्याने शेतकऱ्यांनी समाधान व्यक्त केले.

विविध भागांतून शेतकरी जनावरे घेऊन तर काही जण जनावरे खरेदी करण्याकरिता आले होते. कोरोनाचा वाढता धोका लक्षात घेऊन या ठिकाणी गर्दी टाळून आणि फिजीकल डिस्टन्स ठेवण्यात आला होता. मार्केटमध्ये प्रवेश करणाऱ्या प्रत्येक व्यक्तीला सॅनिटायझरचा वापर करण्यास सांगितले जात होते. तसेच प्रत्येक व्यक्तीची चौकशी करून बाजारात सोडले जात होते. ज्या व्यक्ती मास्क अथवा रुमालाचा वापर करीत होते त्यांनाच मार्केटमध्ये प्रवेश दिला जात होता. तापमापक यंत्राच्या माध्यमातून प्रत्येकाची तपासणी केली जात होती, अशी माहिती बाजार समितीच्या सूत्रांनी दिली.