संजीवनी कारखान्याकडून प्रतिदिन ६० हजार लीटर सॅनिटायझरची निर्मिती 

नगर  ः केंद्र सरकारच्या अन्न व औषध प्रशासनाच्या परवानगीनंतर कोपरगाव तालुक्यातील संजीवनी सहकारी साखर कारखान्याकडून दर दिवसाला सुमारे ६० हजार लीटर संजीवनी सॅनिटायझरची निर्मिती केली जात आहे. नगरसह पुणे, मुंबई, नाशिक, बीड, जळगाव आदी भागात या सॅनिटायझरचा पुरवठा केला जात असल्याचे सूत्रांनी सांगितले. 

‘कोरोना’च्या पार्श्वभूमीवर सध्या लॉकडाउन आहे. ‘कोरोना’चा संसर्ग रोखण्यासाठी सॅनिटायझर महत्त्वाचे आहे. त्यामुळे त्याची मागणी वाढल्यानंतर आसवनी, अल्कोहोल तयार करणाऱ्या प्रकल्पांना सॅनिटायझर निर्मिती करण्याची केंद्र सरकारच्या अन्न औषध प्रशासनाने परवानगी दिल्यानंतर कोपरगाव येथील संजीवनी सहकारी साखर कारखान्याने गेल्या अकरा दिवसांपासून ८० टक्के अल्कोहोलचा समावेश असलेल्या सॅनिटायझरची निर्मिती सुरु केली आहे. येथे ९०, १८० मिली, अर्धा, एक व पाच लीटर पॅकिंगमध्ये सॅनिटायझर तयार केले जात आहे. दर दिवसाला ९० व १८० मिली व एक लीटरच्या प्रत्येकी पन्नास हजार बाटल्या व पाच लीटरचा दोन हजार कॅनमधून  साठ हजार लीटर सॅनिटायझर तयार केले  जात  असल्याचे कारखान्याचे महाव्यवस्थापक शिवाजीराव दिवटे यांनी  सांगितले.