औरंगाबादमध्ये थेट शेतीमाल विक्रीची उलाढाल १५ कोटींवर

औरंगाबाद  : औरंगाबाद शहरासह ग्रामीण भागात भाजीपाला व फळे पुरवठादार शेतकरी, शेतकरी गटांच्या माध्यमातून होणारी थेट शेतीमाल विक्रीची उलाढाल १५ कोटींवर पोहोचली आहे. ऑगस्टच्या तिसऱ्या आठवड्यात ही उलाढाल १२ कोटी ३७ लाख ८७ हजार ६७२ रुपयांवर होती.   

‘कोरोना’च्या पार्श्वभूमीवर लॉकडाउन करण्यात आले. त्याचा परिणाम शेतीमालाच्या विक्रीवर झाला. त्यामुळे शेतकरी ते ग्राहक थेट फळे, भाजीपाला विक्रीची संकल्पना पुढे आली. कृषी विभागाच्या पुढाकारातून औरंगाबाद शहरात २९ मार्चपासून प्रत्यक्ष शेतकरी, शेतकरी उत्पादक कंपनी व शेतकरी गटांमार्फत प्रत्यक्ष फळे, भाजीपाला विक्री सुरू झाली.

तेव्हापासून २२ ऑगस्टपर्यंत औरंगाबाद शहरासह सर्व तालुक्यांत या विक्रीतून तब्बल बारा कोटी ३७ लाख ८७ हजार ६७२ रुपयांची उलाढाल झाली होती. २३ सप्टेंबरपर्यंत ही उलाढाल १५ कोटी १० लाख ८० हजार ८३२ रुपयांवर पोहोचली आहे. २२ व २३ सप्टेंबरला जिल्ह्यात विविध शेतकरी व शेतकरी गटांनी ३९ हजार ८२० किलो भाजीपाला व ३० हजार ४४० किलो फळांची विक्री केली तर २३ सप्टेंबर अखेरपर्यंत ५६ लाख ६५ हजार ८८७ किलो भाजीपाला व ६५ लाख ९६ हजार ६१७ किलो फळांची विक्री या थेट विक्री या साखळीतून झाली असल्याची माहिती कृषी विभागाच्यावतीने देण्यात आली.

सुरुवातीला जवळपास वीस शेतकरी, शेतकरी गट व शेतकरी उत्पादक कंपन्यांच्या सहभागातून सुरू झालेला हा उपक्रम ७७ सहभागीदारपर्यंत पोहोचला असल्याचे कृषी विभागाकडून सांगण्यात आले. शेतकऱ्यांना आपला शेतीमाल थेट ग्राहकांना विकता यावा, त्यांच्या शेतीमालाला योग्य दर मिळावा या उद्देशाने ही विक्रीची साखळी कृषी विभागाच्या पुढाकारातून निर्माण करण्यात आली होती. मोठ्या जोमाने सुरू झालेल्या या विक्री व्यवस्थेची गती सद्यःस्थितीत बऱ्यापैकी मंदावल्याचे चित्र आहे.